Sortu EAJrekin eta Geroa Bairekin akordioetara heltzen 'saiatuko' da

Sortuk larunbat honetan azaldu duenez, euskal herritarrek "geure arteko akordioak" nahi dituzte, eta "prozesu  soberanista partekatzeko" prest azaldu da, horretarako adostasunak lortzen "saiatuko" dela nabarmendu du, "EAJrekin eta Geroa Bairekin ere", "beharrezkoak" direlako.

Hasier Arraiz Sortuko Kontseilu Nazionaleko koordinatzaileak alderdiko udako eskolen itxierako hitzaldian (200 bat militanteren aurrean eta kontseilu nazionaleko beste kideekin batera) esan duenez,  gainerako alderdi nazionalistekin akordioak lortzeko beharraren deia egin du.

"Geure herriak begitara begiratu gaitu, eta altu eta argi esan digu zer den nahi duena", adierazi du. "Nahi duena Euskal Herria naziotzat hartzea da, eta, beraz, erabakitzeko subjektu moduan, geure artean ados jarri behar dugu, Madrilekin eta Parisekin egiteko ezer ez dagoela ikusita", gaineratu du.

"Trena gerturatzen ari da, erabaki garrantzitsua hartzeko unea da, eta bakoitzak pentsatu behar du alderdi politiko moduan edo herri moduan hartu nahi dituen", esan die gainerako alderdi nazionalistei, eta, horren ostean, bere aldetik, ezker abertzaleak "argi" duela esan du eta Sortuk "prozesu nazionalistaren lidergoa partekatu nahi" duela, Euskal Herriarentzako autodeterminazioaren eskubidea aitortzen duten indar politiko eta sozialekin.

ETAren amaieraren ostean PPren Gobernuaren politikaren eta "gatazka politikoa" egon izana ukatzen duen teoriaren aurkako hitzak ere izan ditu.