ELA: 'EAJk, PSOEk, PPk eta UPNk politika antisozial bera egiten dute'

Adolfo Muñoz "Txiki" ELAko idazkari nagusiak EAJ, PSOE, PP eta UPNri "politika antisozial bera" egitea egotzi die, Euskadin hitzartutako zerga itunaren "antzerkitik" eta "desinformaziotik" haratago.

Sindikatuko idazkariak PP zerga itunera batu izana aztertu du, baita joan den ostiralean Yolanda Barcina Nafarroako presidenteak Alderdi Sozialistari egindako eskaintza ere. Barcinak Nafarroan ituna lortzeko proposamena luzatu zion PSNri.

Fiskalitatearen akordioa "iruzur fiskala" dela adierazi du Muñozek. "Neurri horiekin euskal fiskalitatearen eta Europako fiskalitatearen artean dagoen presioa ez da murrizten", azpimarratu du.

"Doitze eta murrizketa gehiago izatera zuzentzen da", kritikatu du. "PP da akordioaren zeinua zehazten duena. Izan ere, Alderdi Popularrak aurkeztutako programa ez dago EAJ eta PSE-EEk sinatutako akordiotik urrun", gaineratu du.

Ostiralean Yolanda Barcinak PSNri egindako proposamena ere gogoratu du "Txiki" Muñozek. Barcinak "Euskal Autonomia Erkidegoan lortutako antzeko akordioa lortzeko eskua luzatu zion PSNri". "Argi erakusten du lau alderdiak, PSOE, PP, UPN eta EAJ, leku guztietan politika bera egiten ari direla. Gizartearen beharrak asetzen ez dituen politika antisozial bat", amaitu du.

LABen salaketa

Bestalde, LAB sindikatuak PP itun fiskalera batu izanak "hasierako akordioko arlo atzerakoienetan sakontzea" dakarrela salatu du. "Kapitalaren errentaren gehikortasunak gutxituko ditu eta sozietate-zergan berriz ere laguntzak jarriko ditu", adierazi du.

 

Ohar batean, Arabako Foru Aldundiak EAJ-PSEk sozietate-zergan proposatutako erreformaren eragina aztertu zuela gogoratu du. "Zerga-bilketan minorazioa egongo zuela ondorioztatu zuen", esan du. LABen aburuz, "PPk ezarritako pizgarri berriekin zerga horren bidez lortutako bilketa are txikiagoa izango da".

"Ituna politikoa da eta ez da fiskalitatera soilik mugatzen", azpimarratu du sindikatu abertzaleak. "Argi erakusten du hiru alderdiek burgesiaren eta klase ertain eta altuen interesak babesteko duten ardura, eta ez langileak", amaitu du.