Parlamentuak Barcina gaitzestea eztabaidatuko du

Nafarroako Parlamentuak Yolanda Barcina gaitzesteko mozioa eztabaidatuko du. Izquierda-Ezkerrak aurkeztu du mozioa, Nafarroako Presidenteak Guardia Zibilak ustez D ereduari buruz egindako txostenaren inguruan izan duen jarrerarengatik. Barcinak eta Hezkuntza sailburuak azalpenak eman beharko dituzte.

Barne Ministerioak hezkuntzaren inguruko txostenik ez duela egin adierazi eta egun gutxira, Guardia Zibilak ustez egindako txostena eztabaidagai izan dute gaur Parlamentuko Mahaian eta Bozeramaileen Batzordean.

Gobernuko presidentea gaitzesteko I-Ek aurkeztutako mozioa onartu da, “egiazkotzat jo baitu Guardia Zibilaren txostena”. Ardurak ere eskatu ditu, “kargu instituzionalek emandako zehaztugabeko informazioarengatik”.

Bildu eta Aralar-NaBaik egindako eskaera ere onartu dute, eta Yolanda Barcinak eta Jose Iribas Hezkuntza sailburuak azalpenak eman beharko dituzte.

Oposizioko kideek, PPNk ezik, txostena argitaratzeko ere eskatu dute, “egiazkoa bada”.