Europak Euskadi 'bere magalean' hartuko duela esan du Ortuzarrek

Euskadik eta Kataluniak euren etorkizuna erabakitzen badute ere, Europak “bere magalean” hartuko dituela esan du gaur Andoni Ortuzar EAJko presidenteak. “Euskal gatazkaren konponbidea” Europar Batasunaren “barruan” dagoela gaineratu du. “Ez dugu geure burua Europatik kanpo ikusten eta, gertatzen dena gertatzen dela ere, ez gara Europatik kanpo egongo”, azpimarratu du.

Radio Euskadiri eskainitako elkarrizketan, ‘Europari begira’ lelopean EAJk igandean egingo duen Aberri Egunari buruz mintzatu da Ortuzar. Euskadiren etorkizuna eta euskal eraikuntza nazionala Europan izango dira ospakizun horren oinarri nagusiak, EAJren presidentearen hitzetan. “Kataluniako afera ere hor dago eta gai hori arretaz jarraituko dugu, baina horrek ez du gure jarduera politikoa baldintzatuko”.

Bestalde, Euskadik Estatuarekiko duen harremanari buruz, “aldebikotasuna” defendatu du Ortuzarrek.

Koldo Mediavilla EAJko Harreman Instituzionaletarako idazkariak, bestalde, Onda Vascari elkarrizketa eskaini dio eta, bertan, Euskadiren “jomuga” bakarra “Europa” dela azpimarratu du. “Orain, inoiz baino gehiago, Europa gara”.

Jeltzaleek ideia horren alde lan egingo dutela ohartarazi du Mediavillak eta, “berandu baino lehen” iritsiko dela nabarmendu du.

Ibilbidea “pausoak emanez” eta “ibiltzen” egin behar dela azpimarratu du jeltzaleak.