Politika -
Omenaldia
Gipuzkoako Aldundiak ikurriña handi bat jarriko du larunbat honetan
Horrela, euskal erakundeetan Espainiako banderaren "inposaketa" salatu nahi du foru Gobernuak. "Inposaketaren aurrean gurea aldarrikatu nahi dugu", azpimarratu du Garitanok.
Erredakzioa
14 metroko altuera izango duen haga batean ikurriña "handi" bat jarriko du Gipuzkoako Foru Aldundiak datorren larunbatean, euskal erakundeetan Espainiako banderaren "inposaketa" salatzeko.
"Inposaketaren aurrean gurea aldarrikatu nahi dugu", nabarmendu du Martin Garitano ahaldun nagusiak.
"Gure erakundeetan Espainiako bandera inposatu nahi dutenen aurrean" ikurriñari omenaldia egiteko ekitaldi bat antolatu du foru Gobernuak Donostiako Gipuzkoa plazan, Garitanok Ordiziako Artzain Egunean gogorarazi duenez.
Ekitaldi "xumean" ikurriña "handi" bat 14 metroko haga batean jarriko dutela iragarri du Garitanok, Gernikako bonbardaketaren 77. urteurrenean, "gipuzkoarren borondatea azaltzeko". Gainera, EAJrekin akordioa lortu eta gero, 'Geurea ikurriña' leloarekin plaka bat jarriko dute.
