EH Bilduk 'kalumniatzen' duten komunikabideak salatuko ditu

EH Bilduk astearte honetan iragarri duenez, hemendik aurrera auzitegietara joko du Sortu, EA, Aralar eta Alternatiba alderdiek osatzen duten koalizioaren aurka "mehatxuak edota kalumniak" jaurtitzen dituzten komunikabideen kontra.

Peio Urizar eta Maite Ubiria EH Bilduko koalizioko buruzagiek gaur prentsaurrekoan azaldu dutenez, euren zerbitzu juridikoak salaketa bat idazten ari dira La Razón egunkariaren aurka, ETAk EH Bildu Batasunaren ordezko izateko alderditzat inskribatu zuela zioen informazioarengatik.

Urizarren hitzetan, informazio horrek koalizioaren "pazientzia amaitu" du, eta irizpidez aldatzea erabaki du, beraz, hemendik aurrera justiziara joko dutela nabarmendu du, komunikabide baten mehatxuak edota kalumniak jasan dituztela sentitzen dutenenean.

"EH Bildu intoxikatzeko jaurtitako mehatxuak, kalumniak eta gezurrak koalizioa oso argi izan den gaietan zalantzaren itzala zabaltzea eta mantentzea bilatzen dutela konbentzituta gaude", adierazi du Urizarrek. Halaber, informazio mota horiek "euskal gizartearen normalizazioa ekiditeko" asmoa dutela gaineratu du.

Urizarrek esan duenez, EH Bilduk "hiru urte daramatza zaparrada pasatzea", egoera "lasaitzea, eta "komunikabide batzuek" koalizioa abertzalearekin duten harremana "normaltzen joatea itxaroten", "baina ez da hala, eta ez da hala izatera iritsiko", beraz, auzitegietara jotzea erabaki du kalumniak salatzeko.

Erabaki honek "irizpide aldaketa" bat dakar, "EH Bilduren aurkako estrategia argi bat delako", azaldu du Urizarrek. "Koalizioa EH Bildurenak ez diren parametro batzuen oinarriekin epaitzen da", deitoratu du, alderdiak ETArekin zerikusia duela dioten informazioen harira.