Politika -
Epaiketa Auzitegi Nazionalean
Ayestaranek ez zuela hiru guardia zibilen hilketan parte hartu esan du
Segurtasun Indarretako agenteen aurkako erasoengatik hiru delitu leporatu dizkiote Ayestarani, eta bere abokatuari soilik erantzun dio epaiketan; Fiskaltzaren galderak baztertu egin ditu.
Erredakzioa
Jose Lorenzo Ayestaran Legorburu "Fanecas" ETAko kideak ukatu egin du Auzitegi Nazionalean 1980ko urriaren 4an Agurainen (Araba) hiru guardia zibilen hilketan parte hartu izana, txirrindulari gazteen lasterketa batean lehiatzen ari zirela.
"Ez dut zerikusirik epaiketa honetan leporatzen dizkidaten ekintzekin", esan du Ayestaranek. Jose Vazquez Platas, Avelino Palma Brioa eta Angel Prado Mellaren hilketagatik 81 urteko espetxe zigorra jaso lezake.
Segurtasun Indarretako agenteen aurkako erasoengatik hiru delitu leporatu dizkiote Ayestarani, eta epaiketan zehar, bere abokatuaren galderei baino ez die erantzun, uko egin baitio Fiskaltzaren eta akusazioaren zalantzak argitzeari.
Bestalde, Felix Alberto Lopez de Lacalle Gauna, "Mobutu" ETAko kidea eta Ismael Arrieta Perez de Mendiola Aguraingo apaiz ohiak ukatu egin dute "duela urte asko" jazotako ekintzetan parte hartu izana. Kasu berdinagatik kondenatuak izan ziren biak.
Maria Soledad Iparraguirre eta bere ama Maria Luisa Genecheak bideokonferentzia bidez adierazi dute ez dutela hilketa eta gero akusatuak edo beste ETAko kiderik baserrian hartu izana gogoratzen, eta polizien aurrean egindako adierazpenen "baldintza antidemokratikoak" salatu dituzte.
