Politika -
Katalunia
Mas ERCk inoiz izandako hautagairik onena da, Fernandez Diazen ustean
Barne Ministerioaren arabera, ERCk "ospe handia galdu" zuen hiruko gobernutik atera zenean, eta orain inoiz baino indartsuago dago.
Erredakzioa
Jorge Fernandez Diaz Barne ministroak esan duenez, Artur Mas Generalitateko presidentea Esquerra Republicana de Catalunya (ERC) alderdiak "inoiz izandako hautagairik" onena da, baina, halere, "ez da Kataluniako agenda politikoa markatzen ari".
TVE telebista-katean egindako adierazpenetan, Fernandez Diazek bat egin du Mariano Rajoy Espainiako Gobernuko presidenteak Masen inguruan esandakoekin. Rajoyk ere esan zuen Mas ez dela Kataluniako agenda politikoa markatzen ari, Oriol Junqueras edo Carme Forcadell Assemblea Nacional Catalanako presidentea baizik.
"Argi dago Esquerrak ez duela inoiz izan Artur Mas baino hautagai hoberik", esan du Fernandez Diazek, eta ERCk "ospe handia galdu zuen" hiruko gobernutik atera zenean, eta orain inoiz baino indartsuago dago, gaineratu du.
Masi zuzenduta, bere arerio nagusia ez da nazio espainiarra, bere burua baizik, bera baita "aurrera ihes egin duen Estatu horren ordezkari", esan dio.
A-9ko kontsultaren inguruan, Fernandez Diazek berriz ere esan du, legearen eta Konstituzioaren kontrakoa izateaz gain, ekimen "penagarria" ere badela, eta Kataluniaren ongizatearen eta Espainia osoaren identitate politiko eta historikoaren kontra egiten duela.
