Bake Lantalderik gabe 'pausoak' emango dituztela esan du Arraizek

Nahiz eta Bake eta Elkarbizitzarako Lantaldea martxan ez jarri EH Bilduk “mugimenduak eta pausoak” emango dituela esan dio Hasier Arraiz Sortuko koordinatzaile nazionalak Idoia Mendia PSE-EEko idazkari nagusiari.

EH Bilduko eta PSE-EEko ordezkaritzak bildu dira gaur, EAEko sozialisten Bilboko egoitzan. PSE-EEko idazkari nagusi bezala alderdiei eta kolektibo sozialei bere burua aurkezteko bilera sorta egiten ari da Mendia.

Arraizek, Unai Ziarretak (EA), Oskar Matutek (Alternatiba) eta Rebeka Uberak (Aralar) bileran parte hartu dute EH Bilduren aldetik, eta Mendia, Miguel Angel Morales, Begoña Gil eta Mikel Cabieces sozialistek.

Bilera amaitu eta gero, bi alderdien arteko “harreman berri” baterako “abiapuntua” izan dela azaldu du Arraizek. Bilerak “Euskal Herriaren normalizazio politikoa” lortzen lagunduko duela erantsi du EH Bilduko legebiltzarkideak.

“Desadostasun oso handiak”

“Desadostasun politikoak gaur oso handiak direla egia da, baina desadostasun sakon horien gainetik errespetua eta biek elkarri egindako kaltea onartzea egon behar dira; kultura politiko oso desberdinak gara eta orain gutxira arte aurrez aurre egon gara”, gaineratu du.

Arraizen hitzetan, esparru sozialean eta ekonomikoan akordio batera heltzea “errazagoa” dute EH Bilduk eta PSE-EEk, Eusko Legebiltzarreko bozketa ugaritan agerian geratu den bezala.

Sozialistek “elkarrizketari baldintzak jarri nahi dizkiote eta EH Bilduk elkarrizketak baldintza berriak sortzen dituela uste du”, azaldu du Arraizek.

Bake eta Elkarbizitzarako Lantaldearen kasuan, PSE-EEk jarrera “burugogorra” duela kritikatu du EH Bilduko legebiltzarkideak. Sozialistak “edozein mugimenduren aurrean itxita daude”, adierazi du. “Mugitzeko eta aurrerapausoak emateko borondatea dugula esan diegu, sozialistekin ala gabe”, esan du.