Euskarazko medioei emandako laguntzak aztertzea eskatu diote Urkulluri

Euskarazko hedabideen jarraipena bermatzeko "beharrezkoak diren neurriak" aztertzeko eskatu dio Eusko Legebiltzarrak Eusko Jaurlaritzari, aipaturiko hedabideek euskararen normalizazioan duten "garrantziagatik".

EH Bilduren proposamenez eztabaidatu dute gaia Legebiltzarrean. Koalizioaren iritziz, euskarazko hedabideei emandako diru-laguntzetan izandako murrizketak "onartezinak eta justifika ezinak dira". Eusko Jaurlaritzak euskara hutsean argitaratzen den egunkari bakarrari, Berriari, diru-laguntza % 14 murriztea salatu du EH Bilduk. Gainera, koalizioak diru-laguntzak emateko irizpideak aldatzea kritikatu du.

EH Bilduk testu bat adostu du EAJ eta PSE-EE alderdiekin, eta PP zein UPyD, berriz, kontra agertu dira. Hala, euskarazko hedabideen jarraipena bermatzeko, hedabide nagusienekin batera azterketa bat egiteko eta "beharrezko neurriak ikertzeko", diru-laguntzak barne, eskatu die EH Bilduk, EAJk eta PSE-EEk Eusko Jaurlaritzari. Aipaturiko hiru alderdiek euskararen normalizaziorako hedabide horiek duten garrantzia nabarmendu dute.

Bestalde, diru-laguntzak ematerako orduan euskarazko hedabide bakoitzak euskararen normalizaziorako duten garrantzia, eraginkortasuna eta aniztasuna kontuan hartzeko eskatu dute. Halaber, diru-laguntza deialdiak urte hasieran argitaratzea aldarrikatu dute.