Politika -
Europar Batasuna
'Euskararen lurraldeekin' euroeskualde bat sortzea babestu du EAJk
Andoni Ortuzarren esanetan, EAEko eta Nafarroako biztanleek "iparraldera begiratu behar dute, Madrilera baino gehiago".
Erredakzioa
Andoni Ortuzar EAJko presidenteak "euskararen lurralde guztiei aterpe emateko euroeskualde bat" sortzearen alde egin du. Halaber, EAEko eta Nafarroako biztanleek "iparraldera" begiratu behar dutela iritzi dio, "Madrilera baino gehiago".
Mugaz gaindiko lankidetzari buruz Hondarribian (Gipuzkoa) eskainitako hitzaldi batean, ekitaldira hurbildu direnak “lurraldeen arteko lankidetzaren aldekoak” direla nabarmendu du buruzagi jeltzaleak.
"Euskararen lurralde guztiei aterpe emateko euroeskualde bat" sortzearen alde agertu da Ortuzar, "Piriniotako mugaren bi aldeetako herrien eta errealitate administratiboen artean lankidetza sustatzeko".
"Laburbilduz, euskararen lurraldeen potentzial ekonomikoa, kulturala eta turistikoa garatuko lukeen euroeskualde bat, ardatz atlantiko osoarentzat giltzarri izango litzatekeena", azaldu du.
Horren esanetan, baina, "Hegoaldeko euskaldunek iparraldera begiratu behar dute, Madrilera baino gehiago; eta Iparraldeko euskaldunek hegoaldera, Parisera baino gehiago".
