Hauteskunde Legearen erreforma aurkeztuko du PPk legegintzaldi honetan

Alderdi Popularrak Hauteskunde Legearen erreforma aurkeztuko du Espainiako Diputatuen Kongresuan legegintzaldia amaitu aurretik. Mariano Rajoyk gidatutako alderdiak horri buruzko eztabaida zabaldu nahi du, nahiz eta jakin litekeena dela Espainiako Gorteak desegin aurretik onartzeko denborarik ez izatea. Erreforma horrekin hauteskundeetan boto gehien lortzen dituen alderdiak agintzea lortu nahi du Alderdi Popularrak.

Rafael Hernando Alderdi Popularrak Espainiako Diputatuen Kongresuan duen bozeramaileak iragarri du haren alderdiaren asmoa PPren konferentzia politikoaren bigarren egunaren hasi aurretik kazetariei egindako adierazpenetan.

Atzo, konferentzia politikoaren lehen egunean, Hauteskunde Legearen erreforma mahaigaineratu zuen Alderdi Popularrak. PPk proposatzen duen erreforma onartuko balitz, gobernagarritasun hobaria edo saria izango luke hauteskundeetan boto gehien eskuratzen duen alderdiak.

Proposamen hori Diputatuen Kongresuan "berehala" aurkeztea defendatu du Rafael Hernandok "gutxienez, gaiarekiko eztabaida ireki dadin". Halaber, esan du posible izango dela erreforma aurrera ateratzea baldin eta "adostasun egokia" badago.

Erreforma hori beste inoren babesik gabe onartzeko aukeraz galdetuta, Hernandok azpimarratu du akordioa lortzea gustatuko litzaiokeela. "Horrela ez bada, bistan denez, gauzak zaildu egingo dira", gaineratu du.

Bestalde, Rafael Hernandok adierazi du PPk aurrerapausoak eman nahi dituela barne demokrazia hobetzeko eta "militante bat, boto bat" eredua ezartzeko.

Beldurraren botoa astintzea ukatu du Rajoyk

Mariano Rajoy Espainiako Gobernuko presidenteak ukatu egin du PPk agintzen ez badu Espainian gerta daitekeenaz egindako ohartarazpenekin beldurraren botoa astindu nahi izan duena. Are gehiago, azpimarratu du beldurra ematen duela Greziaren egoerak, Ahal Duguk SYRIZAren politikak babesteak eta PSOEk Ahal Dugu babesteak.

Espainiaren eta Greziaren egoera alderatu ditu Rajoyk PPren konferentzia politikoaren itxiera ekitaldian. Halaber, Rajoyk nabarmendu du Espainiak erreforma gehiago behar dituela; izan ere, "gelditzea atzera egitearen parekoa da".