Politika -

Auzitegi Gorena

Gorenak auzitara eramango du Goioaga ETAko kide izatea egotzita

Amaiurren senatariak azpimarratu du "inputazio guztiak faltsuak" direla eta gogora ekarri du akusazio beragatik epaitua eta absolbitua izan zela 2012an.

Iñaki Goioaga Amaiurren senataria. Argazkia: EiTB
Iñaki Goioaga Amaiurren senataria.
Inputazio guztiak faltsuak direla azpimarratu du Goioagak

1:14

agentziak | erredakzioa

Whatsapp Facebook Twitter Telegram Email

Auzitegi Gorenak auzitara eramango du Iñaki Goioaga Amaiurren senataria ETAko kide izatea, terrorismoa finantzatzea, Ogasun Publikoaren kontrako delitua, Gizarte Segurantzari iruzur egitea eta dirua zuritzea leporatuta.

Eloy Velasco Auzitegi Nazionaleko epaileak aurreko ekainean helarazi zion Auzitegi Gorenari idatzi bat, Amaiurreko senatariaren kontrako auzibidea abian jartzeko eskaera arrazoitua. Izan ere, senataria izaki, Gorenarena da horretarako eskumena.

Epailearen arabera, froga nahikoa dago senataria ETAren "kartzela fronteko" kide zela pentsatzeko; horregatik, ETAko kide izateagatik inputatzea eskatu zion Auzitegi Gorenari.

Velascoren esanetan, Goioaga BL Abokatuen Kolektiboko kide izateagatik auzipetu behar da, ETAren aginduetara lan egiten duten abokatuak direlakoan.

Goioaga: “Inputazio guztiak erabat faltsuak dira”

Iñaki Goioaga Amaiurren senatariak agerraldia egin du Senatuan eta argi adierazi du “inputazio guztiak erabat faltsuak” direla.

“Inputazio bakar bat bera ere ez da egiazkoa. 2012an, akusazio horiengatik epaitu  eta errugabetzat jo ninduten”, gogoratu du.

Auzitegi Gorenaren jakinarazpenik jaso ez duela eta inputazioaren berri komunikabideen bidez izan duela azaldu du.

“Euskal presoei asistentzia juridikoa eskaini diet eta oso harro nago hortaz; abokatua naiz, baita senataria ere, eta nire profesioa arduraz eta duintasunez aurrera eramaten ahalegintzen naiz”, erantsi du.

Amaiurren senatariak esan du “beldurrik” ez duela eta Auzitegi Gorenaren esku jarriko duela bere burua, “edozein motatako azalpenak eta argipenak emateko”.

Goioagaren iritzian, “jazarpen politiko eta ideologiko baten baitan kokatu behar da hau guztia; Euskal Herriko gatazka politikoaren arazoa poliziaren eta errepresioaren bidez konponduko dutenen erabakia da hau”, kritikatu du.

Gauzak horrela, senatari kargua uzteko asmorik ez duela adierazi du. “Lehendabizi, izapideak eta agerraldiak aztertu behar ditugu. Auzitegi Gorenak deklaratzera deituko didala suposatzen dut, baina oraingoz kargua uzteko arrazoirik ez dago”, zehaztu du.

 

 

Hau zure interesekoa bada, baliteke beste gai hauek ere izatea
Auzitegi Gorena bideoak Delituak albisteak ETA albisteak Amaiur albisteak