Venezuelak ANren salaketak ikertuko dituela agindu dio Espainiari

Hugo Chavez Venezuelako presidenteak Eloy Velasco Auzitegi Nazionaleko epailearen salaketak ikertuko dituela agindu dio Espainiako Gobernuari. Era berean, "goitik behera" ukatu du bere Gobernuak ETArekin edota FARC-ekin zerikusirik duenik.

Espainiako iturri diplomatikoen arabera, Chavez-ek bere Gobernuko "kargu ertainen" batek ETAri edo FARC-ei laguntza eman ote dien ikertuko duela agin du dio Espainiari.

Beraz, Espainiako Gobernua ikerketa horien emaitzen zain agertuko dela esan du. Zerbait aurkitzen badu, Chavezen Gobernuak behar bésala jokatuko duen itxaropena ere agertu du Zapateroren Gobernuak.

Goizean, Venezuelako Gobernuak ukatu egin du Eloy Velasco Auzitegi Nazionaleko epaileak egin dion salaketa, ETAren eta FARCen arteko aliantza egiten laguntzea, eta "akusazio onartezin" horiek "arrazoi politikoengatik" egin dituztela esan du.

Venezuelako Gobernuak horrelaxe erantzun dio Auzitegi Nazional espainiarreko Eloy Velasco epailearen autoari. Bertan, ETAko eta FARCeko zenbait ustezko kide auziperatu ditu Espainiako Estatuan Kolonbiako goi-kargudunen kontrako atentatuak egiteko lankidetzan aritzea leporatuta.

Hugo Chavez Venezuelako presidenteak uste du salaketa "iragan kolonialaren hondarra" dela.

"Lepoan jarri nahi dizkiguten iraganeko kateen hondarrak dira horiek, baina gu libreak gara", adierazi du Montevideon kazetarien aurrean.

Velascok dio badaudela Venezuelako Gobernuaren "lankidetza" zantzuak FARCen eta ETAren aliantza horretan.

Ez da Felipe Gonzalez aipatzen

"Aipatu autoan, 1989ko maiatzetik Venezuelan bizi den herritar bati egiten zaio erreferentzia, pertsona hori Carlos Andres Perezek eta Felipe Gonzalezek (orduko Venezuelako eta Espainiako presidenteak) garai hartan lotutako akordio bati esker iritsi zen Venezuelara", adierazi du Venezuelako Gobernuak prentsa-ohar baten bidez.

Izenik eman ez badute ere, badirudi Arturo Cubillas ETAko ustezko kideari egiten diotela erreferentzia. Velasco epaileak auzipetuen artean sartu du Venezuelako herritar hori.

Cubillas Hugo Chavezen goi kargudun izan den emakume venezuelar batekin ezkondu zen eta Venezuelako hiritartasuna du. 2005ean Nekazaritza Ministerioko Administrazio eta Zerbitzuetako Bulegoko zuzendari izan zen.

Caracasen komunikatuan "harridura" agertu dute autoan "ez delako agertzen" Cubillas Venezuelara eraman zuen akordioaren "egileen izena". Cubillas ETAko beste hamaika ustezko kiderekin batera iritsi zen Venezuelara 1989an Aljeriatik, ETAren eta Espainiako Gobernuaren negoziaketek porrot egin ostean.

"Epaileak Hugo Chavez Venezuelako presidentearen izena behin eta berriz esan eta errespeturik gabe aipatzen du, eta salaketa alderdikoiak eta frogatu gabeak egiten dizkio Gobernuari", gaitzetsi dute prentsa-oharrean.

Epailearen salaketa Raul Reyes gerrillariari (Kolonbiako Armadaren eraso batean hildako FARCeko buruzagia) ustez atzemandako ordenagailu batean oinarritzen dela eta ordenagailu horretako informazioa Chavezen kontra salaketa gehiago egiteko erabili izan dutela azpimarratu du Gobernu hegoamerikarrak.

Uribek zuhurtzia eskatu du

Bestalde, Alvaro Uribe Kolonbiako presidenteak "zuhurtzia" eskatu du eta epaile espainiarraren salaketari buruzko ekintzak "bide diplomatikoetatik" egiteko eskatu du.