Fiskalak dio Anza aurreikusitako egunean iritsi zela Tolosara

Anne Kayanakis Baionako (Lapurdi) fiskalak esan du Jon Anza ETAko kidea apirilaren 18an iritsi zela Tolosara (Okzitania, Frantzia), Baionan trena hartu eta aurreikusita zuen bezala. Era berean, geltokira iritsi zenean arropa bat zuela eta apirilaren 29an, aurkitu zutenean, beste bat zeramala zehaztu du Kayanakisek.

Fiskalak jakinarazi du "informazio judiziala" ireki duela Tolosan Anzaren heriotzaren ingurukoak argitzeko.

Kayanakisek esan du "lurralde eskumen" kontu bategatik erabaki dutela auzia Tolosako fiskaltzaren esku uztea, bertan agertu baitzen Anzaren hilotza.

Fiskalak esan du Anza hil osteko denbora tartean gertatu zena eta "administrazio akatsak" (gorpua hilabeteetan identifikatu gabe egon zen ospitalean) argitu behar direla.

Sendiak bahiketaren hipotesiari eusten dio

Sendiak bahiketaren hipotesiari eusten dio Jon Anza ETAko kidearen sendiak bahiketaren hipotesiari eusten dio Anzaren desagerpena azaltzeko, abokatuek gaur jakinarazi dutenez. Anza iragan astean identifikatu zuten Tolosako (Okzitania, Frantzia) gorputegi batean.

Baionan (Lapurdi) emandako prentsaurreko batean, abokatuek esan dute Alfredo Perez Rubalcaba Barne ministro espainiarraren "beste bertsio bat espero" dutela, orain artekoa "bazter daitekeen tesi bakarra" delako, Anzaren familia ordezkatzen duten abokatuen esanetan.

"Zertaz defenditzen da Rubalcaba Jon Anzak diruarekin alde egin zuela dioenean?", adierazi du Arantza Zuluetak, abokatuetako batek. Era berean, "ezinezko" jo du "historial judiziala duen pertsona bat ospitalean ez identifikatzea".

Anne Kayanikis Baionako Auzitegiko fiskalaren bertsioa ere errefusatu egin dute familiaren abokatuek, gorpuaren identifikazioa "gertakari batek" eragin zuela diolako.

"Ikerketa oso garrantzitsua dela ari dira esaten. Badakigu ikerketarako baliabideak azkarrak eta eraginkorrak direla. Argi dago, norbaitek ez du egia esaten", adierazi du Xantiana Cachenautek, Anza sendiaren beste abokatu batek.