Politika -
Ikurrinaren debekua
Madrilek Eurovisioni emandako erantzuna kritikatu du EH Bilduk
Ikurrina defendatzea bere betebeharra zela azaldu du, eta ez zirela "ez lehenengoak ez azkarrenak" izan.
agentziak | erredakzioa
Marian Beitialarrangoitia EH Bilduren diputatuak esan du Espainiako Gobernuaren betebeharra zela ikurrina defendatzea Eurovision jaialdiak "bereziki debekatutako" ikurren artean sartu zuenean, baina ez zirela "ez lehenengoak ez azkarrenak" izan kritikatu du.
Beitialarrangoitia eta Jon Iñarritu koalizio abertzaleko ordezkariak Cecilia Julin Suediak Madrilen duen enbaxadorearekin batzartu dira gaur, gatazka "konpontzeko egindako kudeaketa azkarra" eskertzeko.
Bilera "atsegina" izan dela azaldu du, eta aitortu du ez dela Suediako Gobernuaren eskumena jaialdia antolatzea. Hala, gatazka horrez gain, Europan eta Euskal Herrian bizi diren errealitateez eta horren aurrean dituzten ikuspuntuez hitz egiteko aprobetxatu dute gaurko hitzordua.
