Zabalzaren senideek 'onarpena, egia eta erreparazioa' eskatu dituzte

Mikel Zabalzaren senitartekoek eta lagunek omenaldia egin diote larunbat eguerdian Donostian. 1985eko abenduaren 15ean bere hilotza agertu zen Bidasoa ibaian, arrazoiak argitu gabe. Egun batzuk lehenago, Guardia Zibilak atxilotu egin zuen. Gaur "erreparazioa, onarpena eta egia" aldarrikatu dituzte Donostian egindako omenaldian.

Hamar bat pertsona bildu dira gaur eguerdian Altzan, Donostian, Zabalzaren omenez, 'Mikel Zabalza. Egia, justizia, oroitzapena' lemapean. 31 urte bete dira atxilotu zutenetik.

Ekitaldian, testu bat irakurri dute euskaraz, nola desagertu zen eta Bidasoa ibaian nola agertu zen gogoratzeko. Halaber, gertatutakoari buruz emandako bertsio ofiziala kritikatu dute, ez zutelako Zabalzak "jasandako torturen eta atxiloketaren" aurka familiak ipinitako salaketa kontuan izan.