Politika -
Bilera
Montillak eta Masek ebazpena jaso arte atzeratu dute goi-bilera
Generalitataren presidenteak eta CiUren buruzagiak atzeratu egin dute Estatutuaren murrizketei erantzuteko ekintzen egutegia, uztailaren 10eko manifestazioa izan ezik.
Erredakzioa
Jose Montilla Generalitataren presidenteak eta Artur Mas CiUren buruak Kataluniako buruzagi politikoen goi-bilera eta erantzun bateratu bat emateko osoko bilkura atzeratu dituzte, Auzitegi Konstituzionalak Estatutari buruz eman duen ebazpen osoa eskuartean izan arte.
Montillak eta Masek ordubeteko bilera egin dute Kataluniako presidentearen bulegoan, Parlamentuan.
Auzitegi Konstituzionalak ebazpenaren argudio juridiko guztien argitalpena atzeratu izanak behartu ditu buruzagi kataluniarrak Estatutaren murrizketei erantzuteko ekintzak atzeratzera, nahiz eta uztailaren 10erako deitu duten manifestazio deialdiari eutsi.
Hasiera batean, Kataluniako buruzagi politikoen goi-bilera bat egiteko asmoa zuten bihar arratsaldean, Generalitataren jauregian, Konstituzionalak eragin duen lurrikara politikoari eman beharreko erantzuna adosteko. Era berean, uztailaren 9an aparteko osoko bilkura egitea zuten aurreikusia.
Baina bi zitak atzeratu egin behar izan dituzte, izan ere, Montillak eta Masek uste dute ez duela zentzurik, ebazpena goitik behera irakurri aurretik, erantzuna adostea. Gainera, uztailaren 12ra arte ez dela argitaratuko jakinarazi dute zenbait iturrik.
