Politika -
Dokumentazioa
Ekinen aurkako operazioak 18/98 auziarekin hasi ziren
Baltasar Garzon epaileak "ETAren muina" (Ekin, KAS eta Xaki) deitu zuena ikertu zuen, baina 47 kondenatuetatik 9 absolbitu zituzten. Gainerakoei 2 eta 24 urte arteko kartzela zigorra ezarri zien.
Erredakzioa
2007ko abenduan, Auzitegi Nazionalak Ekin, KAS eta Xakiren aurkako makroprozesuan akusatutako 52 pertsonetatik 47ri 2 eta 24 urte arteko kartzela zigorra jarri zien. Hala ere, 2009ko maiatzean, Auzitegi Gorenak 9 absolbitu zituen eta gainerakoei zigorra laburtu zien, erabakian proportzionaltasunik ez zegoela erabaki ostean.
Prozesuaren izapideak 18/98 auziarekin abiatu ziren, Auzitegi Nazionaleko Baltasar Garzon epailearen eskutik, eta ETAren ingurunearen aurka egin zen lehen prozedura judizial garrantzitsua izan zen. 2009ko abenduaren 7an amaitu zen, "ETAren muina" osatzea leporatuta, Angela Murillo epaileak Auzitegi Nazionalean zuzentzen duen Zigor-Arloko Salako Hirugarren Sekzioak 2 eta 24 urte arteko kartzela zigorrak ezarrita.
Zigorrak murriztu
Epailearen erabakia berrikusi ostean, Auzitegi Gorenak 2009ko maiatzaren 26an, 47 kondenatuetatik 9 absolbitzea erabaki zuen eta gainerako 38etatik 37ri zigorrak murriztu zizkien. Hala ere, hiru erakundeek 1976 eta 2000 artean etengabeko jarduera izan zutela berretsi zuen eta, epaimahaiaren esanetan, "armarik izan ez arren, ETAren helburuetan parte hartzeko borondatea zuten -KAS eta Ekinen kasuan- borroka armatua osatuz".
Auzitegi Gorenaren arabera, kondenatuek talde armatuaren jarduera "kale borroka" kontrolatuz eta zuzenduz osatu zuten; Ekinen kasuan, helburuak aukeratuz, eta Xakirenean, berriz, "erbesteratutako militanteak borroka armaturako errekuperatuz edo horiei ekintza terroristak egitea errazteko dokumentazioa emanez".
