Espainiako Gobernuak 'bidezidorrik' ez dagoela ohartarazi dio ETAri

Maria Teresa Fernandez de la Vega Espainiako Gobernuko lehen presidenteordeak ETAri gogorarazi dio ez dagoela "bidezidorrik" eta agiriek ez dutela baliorik izango indarkeria betiko baztertzea iragartzen ez badute.

"Ez dago ezer esan beharrik berritasunik ez duenari buruz", berretsi du De la Vegak ETAk asteburuan zabaldu zuen agiriaren harira.

Espainiako Gobernuaren ordezkariak uste du "egun" ETAk badakiela ezerk ez duela balio jarduera armatua "guztiz eta betiko" baztertzea ez bada, ez omen dago "bidezidorrik".

Indarkeria baztertzeko erabaki "argia eta sendoa" hartzen ez duten bitartean, Gobernuak Zuzenbidezko Estatuaren tresnak erabiliko omen ditu ETA deuseztatzeko.

Presidenteordeak azpimarratu du "beste behin ere" alderdi politikoek iritzi berbera agertu dutela agiriaren aurrean, eta horrek agerian uzten duela ETAren aurrean "demokratek duten batasuna".