Politika -
Hitzaldia Bilbon
Zapaterori planto egiteko eskatu dio Basagoitik lehendakariari
PPren presidenteak "Tomas Gomezen eredua" jarraitzea aholkatu dio Patxi Lopezi, izan ere, "Zapaterori planto egiteagatik ez da ezer gertatzen, interes orokorra babesten jarrai daiteke".
Erredakzioa
Antonio Basagoiti EAEko PPren presidenteak Jose Luis Rodriguez Zapatero Espainiako presidenteari planto egiteko eskatu dio Patxi Lopez lehendakariari, izan ere, "Tomas Gomezen adibidea hor dago, Zapaterori planto egitea posible da eta ez da ezer gertatzen, interes orokorra babesten jarrai daiteke".
Bilbon emandako hitzaldi batean, Basagoitik begi onez ikusi du Tomas Gomez sozialistak Madrilgo primarioetan lortutako garaipena, horrela "Zapaterok galdu duelako, beste hautagai baten alde (Trinidad Jimenez) agertu zelako publikoki".
Dena dela, Gomezen garaipena "une batekoa" izango omen da, "Esperanza Aguirrek irabaziko baitu" hauteskundeetan.
"Espero dut Zapateroren porrotak PSOEren baitan interes nazionalaren aldeko lerro politiko bat sortuko duela" eta "bi alderdi nagusien arteko adostasuna bilatzen saiatuko dela", azpimarratu du.
Basagoitik azaldu duenez, EAEko PPk "alderdien arteko adostasuna" bilatzen du, bai Euskadin EAJrekiko, bai Estatuan; baina sozialistek "Zapaterok ezarri duen zentro-eskuinaren satanizazioa" gainditu behar dute.