Jauregik 'zuhurtzia' eskatu du 'bakerako aukerak' ikusteko garaian

Ramon Jauregi Presidentzia ministroak esan du ez dakiela ETAren amaiera legegiltzaldi honetan iritsiko den eta bake prozesu baten inguruan "alderdiaz gaindiko" ikuspegia izan behar dela azpimarratu du.

Cope irrati-katean egin dioten elkarrizketan Jauregik azaldu duenez, "arduragabekeria" izango litzateke Gobernuak ETAren amaiera legealdi honetan iritsiko dela esatea. Gainera, alderdi politikoei "batasuna" eta bakeari "inteligentziaz eta zuhurtziaz" itxaroteko eskatu die.

Era berean, Presidentzia ministroa gustura agertu da ezker abertzalea indarkeriak "kalte" egiten diola konturatu izana.

"Ez dakit bakea legealdi honetan iritsiko den, beraz, Gobernua ez da arduragabea izango kalkulu alderdikoi hori goizegi egiteko. Mesedez, ez ezazue uste hori gertatuko dela, bakea lortzeko helburuak alderdiaz gaindiko ikuspegi bat merezi duela badakigu eta", azpimarratu du ministroak.

Jauregik uste du ETAren ahuldadea eta ezker abertzalearen balizko estrategia aldaketa alderdi demokratikoen "batasunak" eta demokraziaren "indarrak" lortu dutela.

"Urte asko daramatzagu lana ondo egiten: aurreko gobernuek, indar politikoek, Frantziaren babesak, euskal gizartearen ardurak", gaineratu du.