Politika -
Ezker abertzalea
Rubalcabak 'zuhurtzia' eskatu du, Batasunan 'ezer ez baita aldatu'
Barne ministroak ohartarazi du "su-eten hitzak" ez duela balio eta ETAk desegin egin beharko duela berretsi du.
Erredakzioa
Alfredo Perez Rubalcaba Barne ministroak berretsi du ez dutela terrorismoaren kontrako borroka aldatu, PPrekin duten akordioa ez dagoela arriskuan eta Batasuna ez dela egongo hauteskundeetan ETArengandik "nabarmen" aldentzen ez den bitartean.
Ser irrati kateari eskainitako elkarrizketa batean, Rubalcabak "zuhurtzia" eskatu du "ez baita ezer aldatu". Izan ere, eztabaida Batasunaren baitakoa dela iritzi dio eta legezkoa izan nahi badu ezinbesteko baldintza bat bete beharko duela gogorarazi du: "ETAri indarkeria utzi behar duela sinestarazten dio edo Batasunak ETA baztertzen du betiko. Horiek dira dauden bi bide bakarrak".
Gainera, udal-hauteskundeetan ezker abertzaleak parte hartzeko aukeraz galdetuta, ETArengandik "nabarmen" aldendu behar duela azpimarratu du.
Rubalcabak ukatu egin du terrorismoaren kontrako borrokaren harira PPrekin duen adostasuna arriskuan dagoela, izan ere, "ez da gobernua legalizatu edo ilegalizatzen duena, auzitegiak baizik".
Era berean, ezker abertzaleari eta ETAri ohartarazi die "su-eten hitza T-4an lurperatuta" geratu zela eta ETAk desegin egin beharko duela berretsi du.
Gainera, ministroak ETAren eta Gobernuaren artean bitartekariek egin dezaketen lana errefusatu du. Ministroaren arabera, arazoa ETAren eta Batasunaren artean dago, ez Estatuarekin.
