Politika -
KALERA KALERA
Presoen hurbilketa eskatu dute Martutene eta Basauriko kartzelen aurrean
Kalera Kalera ekimenak deitutako ekitaldiaren amaieran, Sortuko buruzagi Arkaitz Rodriguezek hitz egin du, eta 2018ak behin betiko irtenbidearen urtea izan behar duela esan du.
AGENTZIAK | EITB.EUS
Euskal presoen hurbilketa eskatuz kontzentrazioak egin dituzte eguerdian Basauriko eta Martuteneko espetxeen parean. Ehunka lagunek hartu dute parte kontzentrazioetan. Gipuzkoan, batzuk Egiatik atera dira eta besteak Hernanitik eta Martutene atarian bat egin dute "Denak gurekin" pankartaren atzean.
Urrunketa eta sakabanaketa politiken ondorioz, presoak, batezbeste, euren etxeetatik 750 kilometrora daudela salatu dute Kalera-kalera ekimenekoek.
Martuteneko ekitaldian, Arkaitz Rodriguez Sortuko idazkari nagusiak "bake eta bizikidetzan oinarritutako etorkizuna eraikitzeko, Madril eta Parisi urratsak emateko" eskatu die eta gatazakaren itenbide integralerako bidean, 2018ak presoak kaleratzeko ibilbide orria zehazten den urtea izan behar duela esan du.
"Gertatuari buruzko benetako errelatoa" ere eskatu du, "ETAko militanteak terroristak direla dioteen aurrean, gatazka armaturik egon dela ukatzen dutenen aurrean, eta Estatu terrorismoak milaka torturatu zein ehunka hiladako sortu dituela asmatua dela diotenen aurrean, benetako errelatoa".
Hala, irtenbide "justua, egonkorra eta denboran iraungo duena" galdegin du Rodriguezek. Horretarako, "preso politikoek kalera atera behar dute, indar okupatzaileek alde egin behar dute eta Estatuek gure eskubide nazionalak errespetatu behar dituzte".
