Jaureguik ziurtatu du Batasuna ez dela egongo hauteskundeetan

Ramon Jauregui Espainiako Gobernuko Presidentzia ministroak ziurtatu du legez kanpoko ezker abertzaleak ez duela parte hartuko 2011ko udal eta foru hauteskundeetan, ETAren amaiera ez dagoela gertu, eta are gehiago, erakunde terrorista behin betiko desagertzea "prozesu luzea" izango dela.

Antena 3 telebista-katean egindako elkarrizketa batean, ministroak adierazi du PSOEn ez dagoela "asmo alderdikoirik" ETAren aurkako borrokan, gaia "oso serioa" baita, eta "oso garrantzitsua Espainiaren historiarentzat".

Jaureguik azaldu nahi izan ditu Jose Blanco Sustapen eta Etxebizitza ministroaren hitzak (ETAren amaiera "gertu" dagoela esan zuen), eta Euskadin "mundu guztiak" mugimenduak daudela "ondorioztatu" duela zehaztu du.

Bere ustez, Batasuna ez da egongo hurrengo hauteskundeetan: "Ez, nire iritziz, ez da egongo. Jose Luis Rodriguez Zapatero presidenteak atzo esan zuenez, Batasunaren mugimenduak eta adierazpenak ez dira nahiko, ez dute balio. ETA desagertzen bada edo haiek [ezker abertzalekoek] indarkeria gaitzesten badute baino ez da posible izango estrategia aldatzea".

Azkenik, Jaureguik nabarmendu du "batasuna"ri eustea eta "mundu horretakoek ez nahastea" dela inportanteena. "Demokraziak eta Gobernuak burua hotza izan behar dute", gaineratu du.