Gipuzkoako Aldundiak 'memoria demokratikotik' eraikitako bizikidetza eskatu du

ETAren amaieraren ostean, eta 'Memoriaren argiak' erakusketa itxita, Gipuzkoako Aldundiak biktimak gogoratu ditu, bereziki erakundearenak. Halaber, "memoria demokratikotik, indarkeria justifikatzen ez duenetik" eraikitako bizikidetza eskatu du; horretarako "kulturaren eta balore demokratikoen alde esfortzu handia" egin behar dela azaldu du.

Ekitaldia Donostian, Koltxo Mitxelena zentro kulturalean, izan da; Karlos Jimenez jo du musika pianoan, eta Juan Kruz Igerabide eta Aritz Gorrotxategi idazleen testuak ere izan dira. Bertan izan dira, besteak beste, ondorengo hauek ere: Markel Olano Gipuzkoako ahaldun nagusia, Denis Itxaso diputatuordea eta Maixabel Lasa terrorismoaren biktimen Eusko Jaurlaritzako arreta bulegoko zuzendari ohia, baita Juan Mari Jauregiren alarguna ere (ETAk hil zuen).

Halaber, ondorengo pertsona hauek ere izan dira: Marisol Garmendia eta Jose Ignacio Asensio diputatuak; Bakartxo Tejeria Eusko Legebiltzarreko presidentea; Juan Carlos Cano Gipuzkoako Batzar Nagusietako PPren bozeramailea; Eneko Andueza Gipuzkoako PSE-EEko idazkari nagusia; Ruben Mugica Coviteko ordezkaria; Juan Ramon Viles Donostiako Udaleko EAJren zinegotzia; Llois Alejandro Irabazikoa; eta Memoria eta Zaintza Frantziako elkarteko ordezkariak.

Olanok "elkartasuna eta gertutasuna" adierazi die "biktima eta senide guztiei", bereziki ETAkoei, eta Gipuzkoa erakundearen biktima "gehien" izan dituen lurraldea izan dela esan du. Desegitea "berandu iritsi da, oso berandu", azaldu du. “Azkenean amaitu da beldurrezko historia hau, inoiz hasi behar ez zuen indarkeria bidegabea", nabarmendu du.

Gipuzkoako ahaldun nagusiak ETAren "historia tristea" deitoratu du, "ordezkatzen ez zuen herri baten izenean, giza eskubideak urratu dituen estrategia politiko-militar batekin, eta euskal politikari kalte izugarria eragin dio, harreman sozialak eta bizikidetza hondatu ditu hainbat urtetan".