Pastor: 'Lehendakariak bete egin ditu apustu politiko guztiak'

Jose Antonio Pastor PSE-EEko bozeramaileak ziurtatu du Patxi Lopez lehendakariak "bete" egin dituela "apustu politiko guztiak".

Radio Popular irrati-katean egindako elkarrizketa batean, Pastorrek erantzun egin dio Joseba Egibar Gipuzkoako EAJren presidenteari. Izan ere, Lopezen Gobernuari "norabidea, zehaztapena eta lidergoa" falta zaizkiola esan du hark.

"Sabin Etxetik (EAJren egoitza) pasatzen dieten gidoia da, papagaioek bezala errepika dezaten", esan du buruzagi sozialistak.

Horren ildotik, "lehendakariak inbestidura egunean Eusko Legebiltzarrean egin zituen apustu politikoak" bete egin direla nabarmendu du: "Eguneroko politikak eraginkorrago kudeatuko ditugula esan zuen, eta egiten ari gara; Espainiako beste edozein erkidego baino lehenago krisialditik aterako garela esan zuen, eta lortzen ari gara; bizitza politikoa normaldu eta intolerantziaren eta terrorismoaren aurkako borroka irabaziko dugula esan zuen; eta lortzen ari gara".

Horrenbestez, ukatu egin du "norabide falta" dagoela eta, aitzitik, "helburu estrategiko guztiak" betetzen ari direla goratu du.

Egibarren hitzak

Aldez aurretik, Joseba Egibarrek esan zuen Gobernuek "lehentasunak ezarri", "hierarkizazioa egin" eta "proiektuak txukundu" egin behar dutela.

Europa Press agentzian egindako elkarrizketan, buruzagi jeltzaleak urteko balantzea egin du, eta legegintzaldiaren hasieran Lopezen Gobernuak "kontzeptu akatsa" egin zuela iradoki du. Bere esanetan, "Gobernu programa" ez edukitzea izan da akatsa.

"Gobernuak uste du komunikazio arazoa duela gizartearekin, gizarteak ez duela ulertzen edo ez direla argi iristen ari herritarrengana, baina gizarteak ezagutu egin ditu jada", azpimarratu du.

"Norabide, zehaztapen eta lidergo falta dagoela uste dut", argudiatu du.