Ekonomia 'iaz baino hobe' dagoela adierazi du lehendakariak

Patxi Lopez lehendakariak adierazi du ekonomiari dagokionez "iaz baino hobe" gaudela, "gure ekonomia hazten hasi baita eta hurrengo urtean are gehiago egingo baitu".

"Industria (gure herrialdearen sostengu nagusia) suspertzen hasi da; turismoak gorakada handia izan du, bisitari kopuruen marka gaindituta; eta enplegua sortzen hasi gara", txalotu du. Nolanahi ere, aitortu egin du "oraingoz" euskal ekonomia ez dela iritsi "nahi dugun eta ahal dugun mailara".

Eusko Jaurlaritzak aurreratu duenez, Gabon zahar eguneko mezuan (gaur gauean igorriko dute osorik EITBko hedabideek) lehendakariak "indarrak batzeko" deia egingo du, ez baita "zatiketak, gatazkak eta lurraldeen edo erakundeen artean liskarrak izateko garaia".

Bestalde, Abiadura Handiko Trena amaitutakoan Euskadi "hiri handia" balitz bezala komunikatuta egongo dela azaldu du.

Mezua, EITBko hedabideetan

Lehendakariaren mezu osoa ETBk, Radio Euskadik, Euskadi Irratiak eta eitb.com-ek eskainiko dute, gaur gauean.

ETB-1ean, euskarazko mezua iluntzeko "Gaur Egun" albistegiaren ostean izango da, 20:30ean, eta Euskadi Irratian, berriz, 21:00etako albiste emankizunaren hasieran.

ETB-2k eta Radio Euskadik 21:00etan eskainiko dute, gaztelaniaz. Jarraian "Teleberri" albistegia izango da ikusgai telebistan eta albiste emankizuna irratian.

eitb.com-ek ere eskainiko du, streaming bidez, euskaraz eta gaztelaniaz. Lehengoa 20:30ean; bigarrena 21:00etan.