Politika -
Hauteskundeak 2019ko maiatzean
Rementeria, Aburto eta Otadui EAJren hautagaiak izango dira berriro Bizkaian
BBBk proposatu ditu. Horrela, azaroan Lurralde Batzarrarekin bukatuko den barne prozesua abiatu dute jeltzaleek.
Agentziak | Erredakzioa
Bizkai Buru Batzarrak (BBB) Unai Rementeria, Ana Otadui eta Juan Mari Aburto proposatu ditu ahaldun nagusi, Batzar nagusietako presidente eta Bilboko alkate izateko hautagai bezala, hurrenez hurren, EAJk jakitera eman duenez. Udal eta foru hauteskundeak 2019ko maiatzaren 26an izango dira.
Horrela, hirurak hautagaiak izango dira berriro, alderdiko militanteek proposamena baieztatzen baldin badute. Litekeena da hala egitea.
Bizkaia lau hauteskunde-barrutitan zatitzen da; Rementeria Busturia-Uribeko zerrendaburua izango da, eta Otadui Durango-Arratiakoa.
Beste bietan, berriz ere, Ibon Bengoetxea Otaolea (Bilbao) eta Imanol Pradales Gil (Enkarterri) izango dira zerrendaburu.
Horrela, azaroan Lurralde Batzarrarekin bukatuko den barne prozesua abiatu du BBBk. Bertan behin betiko hautagaiak izendatuko dituzte jeltzaleek.
Bi estamentuek Bilboko alkategaia Juan Mari Aburto berriro izatea erabaki dute arratsaldean.