Politika -
ETAk hil zuen 2001ean
Ertzaintzako lankideek Iñaki Totorika zena omenduko dute gaur
Ekitaldia lagunartekoa izango da eta Hernaniko Ertzain-etxean egingo dute. Iñaki Totorika bonba-auto bat eztandaraziz hil zuen ETAk, duela hamar urte.
Erredakzioa
Iñaki Totorika ETAk duela 10 urte hildako ertzainaren lankideek omenaldia egingo diote gaur Hernaniko (Gipuzkoa) Ertzain-etxean, Herrizaingo Sailak jakinarazi duenez.
Lankideek haren omenezko lore eskaintza egingo dute, eta ekitaldia lagunartekoa izango da.
Iñaki Totorika 2001ko martxoaren 8tik 9rako gauean hil zuen erakunde terroristak, aldez aurretik galtzadan, biribilgune batean, gurutzatu zuten bonba-auto bat leherraraziz. Gau horretan, kale-indarkeria ekintza ugari egin zituzten.
Eztandaren ondorioz, Totorika hil egin zen, eta haren patruilakidea zauritu.
Atentatuaren egileetako bi, Jon Zubiaurre eta Asier Garcia, gau horretan bertan atxilotu zituzten. Kale jantzian zeuden bi ertzainek telefono-kabina batean atzeman zituzten, atentatua aldarrikatzeko DYAra deitzen ari zirela.
Taldeko burua, Jon Makazaga, 2001eko abuztuan atxilotu zuten, eta atentatuarekin zerikusia izan zuen laugarren pertsona, Imanol Miner, 2002ko maiatzean.
2003an, Auzitegi Nazionalak 93 eta 97 urte arteko espetxe zigorrak ezarri zizkien, hilketa egotzita.
