Politika -
'Faisan auzia'
Gobernuak eta ETAk negoziatzen jarraitzen dutela salatu du Aznarrek
PSOEk legearekin "arazo bat" duela uste du, "bidezidorrak" bilatzen dituelako, GALekin hasieran eta negoziazioarekin "orain".
Erredakzioa
Jose Maria Aznar Espainiako presidente ohiak salatu du ETAren eta Gobernuaren arteko negoziazioei buruzko txostenek agerian uzten dutela Jose Luis Rodriguez Zapateroren Gobernuak herritarrak "engainatu" dituela eta negoziazio prozesuak "martxan jarraitzen" duela. Hori dela eta, Jaime Mayor Oreja ministro ohiak "arrazoia" duela uste du Aznarrek.
"Prozesuak martxan jarraitzen duela, negoziazioak izan direla, espainiarrei engainatu egin dietela eta legea errespetatu gabe harro sentitzen direnak ere badaudela errealitatea bat da", adierazi du Aznarrek Veo telebista katean egin dioten elkarrizketa batean.
Espainiako presidente ohiaren esanetan, "sozialistek beti izan dute arazo bat legearekin", izan ere, "legea eta Zuzenbidezko Estatua ezarri beharrean, bidezidorren bila aritzen dira", hasieran "GALen gerra zikinarekin" eta "orain negoziazioarekin".
Aznarrentzat "oso larria eta kezkagarria" da Alfredo Perez Rubalcaba Barne ministroa "harro" sentitzea "legea ez dutelako betetzen".
