Vicent Sanchis TV3ko zuzendaria: 'Informatzeko modu bakarra onartzen dute'

Vicent Sanchis TV3ko zuzendariaren ahotan, probintziako Hauteskunde-batzordearen erabakiak “informatzeko modu bakarra onartzen du. “Bi baten aurkako partida bat da, eta epailea aurkarien taldekidea da”, erantsi du.

Bartzelonako Hauteskunde-batzordearen ebazpena onartu eta obedituko dutela ziurtatu du Kataluniako telebistaren zuzendariak. “Preso politikoak”, “erbesteratuak” edo “errepresioaren epaiketa” erabiltzea debekatu zien komunikabide publikoei, hauteskunde garaia pasa arte.

Kataluniako telebista publikoa egiten ari den hizkuntzaren erabilpena defendatu du TV3ko zuzendariak. “Preso politiko” eta “erbesteratu” esamoldeak erabiltzeko debekuak “defentsa-gabezia eta ezintasuna” sortzen dituela uste du Sanchisek.

“Preso politikoak” esamoldea TV3en arau ez dela ziurtatu du Sanchisek, eta kazetari bakoitzaren “irizpide profesionalaren” arabera erabili izan dute. “Erbestea” hitza erabiltzeko orduan, ordea, adostasuna zegoela azaldu du komunikabideko buruzagiak. Zentzu horretan, “atzerriko prentsa guztiak erbestean dagoen jendeaz hitz egiten du”, gogorarazi du.

Bestalde, martxoaren 16an Madrilen egindako manifestazio independentistari Espainiako Telebistak egin zionaren “antzeko estaldura” egin zuela ziurtatu du Sanchisek, baina ez die alderdiei kalte-ordainik eman beharko, “inork ez duelako errekurritu”.

Era berean, Hauteskunde-batzordearen ebazpena “adierazpen eta prentsa askatasunarekin bateraezina den zentsura” dela salatu du TV3eko Kontseilu Profesionalak agiri batean.

Kontseilu Profesionalaren hitzetan, “pasatzen ari dena gustatzen ez zaienean berriz idazteko agindua ematen dute” magistratuek.

TV3en albistegietako kontakizunean “erbeste” edo “erbesteratu” hitzak daude, Institut d'Estudis Catalans, Kataluniako Entziklopedia eta Espainiako Hizkuntza Akademiaren esanahiarekin, Kontseiluak gogorarazi duenez.

“Preso politikoak” esamoldeari dagokionez, Europako Kontseiluaren Asanblada Parlamentarioaren definizioa aipatu du TV3ko Kontseilu Profesionalak.

“Espainiako Gobernuak Espainian preso politikorik ez dagoela ziurtatzeko erabiltzen duen oinarri bera baliatzen dute preso politikoei babesa emateko elkarteek kartzelan dauden ekintzaileak eta politikariak ‘preso politikoak’ direla esateko”, ondorioztatu du Kontseiluak.