Terrorismoa hauteskundeetako lehiatik ateratzea eskatu du Jaurlaritzak

Euskaditik kanpo PSEren eta PPren arteko akordioa eta terrorismoaren aurkako borroka hauteskundeetako lehian ez erabiltzeko eskatu die gaur alderdiei Idoia Mendia Eusko Jaurlaritzako bozeramaileak.

Azken egunetan terrorismoaren aurkako politikan eta Euskadiko akordioaren inguruan PPk eta PSEk eztabaidak izan dituzte, eta Gobernu Kontseiluaren ostean emandako prentsaurrekoan gai horri buruz galdetu diote Mendiari.

Terrorismoaren aurkako politika hauteskundeetako lehiatik at uzteko eskatu du Jaurlaritzako bozeramaileak, "arrakasta ugari izan dituelako" eta "Gobernu akordioa oso emaitza onak ematen ari delako".

Maria Dolores de Cospedal PPko idazkari nagusiak "eskergabea" deitu zion atzo Patxi Lopez lehendakariari eta kazetariek horren inguruan galdetu diote Mendiari. PSEk eta PPk sinatutako oinarrien akordioak duen "osasun ona" goraipatu du Exekutiboko bozeramaileak.

Bildu

Bestalde, Bilduren zerrenden inguruan Justiziarekin "lankidetzan" aritzeko Jaurlaritzaren borondatea errepikatu du Mendiak. Koalizioa maiatzaren 22ko hauteskundeetan izango den ala ez epaileek erabaki beharko dutela errepikatu du Justizia sailburuak.

Hala ere, Bildu koalizioaren sinatzaileen inguruan zuen iritzia ez du aldatu Eusko Jaurlaritzak, Mendiaren ahotan. "EA eta Alternatiba bi alderdi demokratiko dira", gogorarazi du.

De Miguel auzia

Gainera, EAJk Alfredo De Migueli karneta eskatu zion, ustezko ustelkeria sare batean auzipetu zutelako, baina aldi berean Eusko Legebiltzarrean "ongietorria eman" zion, Gasteizko Exekutiboko bozeramailearen esanetan, "harrigarria da".

Transferentziak

Azkenik, EAJk eta PSOEk adostutako eskumenen transferentzian "zailtasunak" onartu ditu Mendiak. Gobernuarekin lehen paketearen transferentzia adosteko "zailtasunak" onartu ditu Jaurlaritzak. Eskuduntzak "baldintza onenetan" heldu behar direla azpimarratu du Mendiak