Politika -

Nafarroa

Inbestidurarako baldintzak betetzen ez direla esan dio EH Bilduk Hualderi

Podemosek, bestalde, akordioa lortu bitartean "zuhur" jokatuko duela jakinarazi dio Parlamentuko presidenteari. Ezkerrak, berriz, Maria Chiviteren alde egingo duela aurreratu dio.

Presidentetzarako hautagaiak izendatzeko bilera-sorta abiatu du Hualdek. Argazkia: EFE
Presidentetzarako hautagaiak izendatzeko bilera-sorta abiatu du Hualdek
Presidentetzarako hautagaiak izendatzeko bilera-sorta abiatu du Hualdek. Argazkia: EFE

Agentziak | Erredakzioa

Whatsapp Facebook Twitter Telegram Email

EH Bilduk Nafarroako Parlamentuko presidenteari esan dio ez direla inbestidurarako baldintzak betetzen. Izan ere, mesfidati agertu da PSNren jokabidearekin, negoziazio prozesuan koalizio abertzalea alde batera utzi duelako.

Horixe da, behintzat, Laura Aznal alderdikidearekin batera Unai Hualderekin izandako bileraren ostean, Maiorga Ramirezek adierazi duena. Hain zuzen ere, asteazken honetan abiatu du Hualdek Parlamentuko gainerako alderdiekin egingo duen bilera sorta. Haren helburua da, elkarrizketa horien ondotik, Nafarroako Gobernuko Presidentetza noren esku geratuko den erabakitzea.

Bilera horretan, EH Bilduk argi utzi du ez direla inbestidura saio batean parte hartzeko baldintzak betetzen, Nafarroarentzat proiektu bat eta egonkortasun akordio batzuk eskatzen dituelako horrek, eta aukera hori ez delako oraindik eman, bereziki, "PSNrekin hitz egiteko aukerarik izan ez dugulako".

Podemosek zuhur jokatuko omen du

Podemosek, bestalde, Parlamentuko presidenteari azaldu dio PSNrekin negoziatzen ari direla, "akordio zabal bat" lortzeko asmoz.

Mikel Buil ordezkariak eman du horren berri, Hualderekin bildu ostean egindako agerraldian.

Buil bakarrik joan da gaurko bilerara, eta ondorio argia atera du handik: "Ez dago apenas nobedaderik. Ezkerrarekin eta Geroa Bairekin Gobernua osatu nahi dute sozialistek, datozen lau urteetan politika aurrerakoiak landu ahal izateko".

Chiviteren alde egingo duela ziurtatu dio Ezkerrak Hualderi

Bileraren ondotik, Maria Chivite hautagai sozialistaren inbestidura babesteko asmoa erakutsi du Ezkerrak, "Gobernu programarekin lotutako akordioa" lortzeko bidean daudelako.

Horixe da, hain zuzen, Marisa de Simonek (Ezkerra) Unai Hualderekin hitz egin ondoren adierazi duena. Esan bezala, bi horien arteko solasaldiak ireki du gaur abiatu duten bilera sorta.

Txema Mauleon eta Carlos Guzman alderdikideekin emandako prentsaurrekoan, De Simonek argi utzi du horretarako adostasun batera iritsi behar direla, "baina badirudi ituna hurbil dagoela".

Hualde Ezkerrarekin bildu da

Argazkia: EFE

Bilera sorta

Unai Hualde bilera sorta egiten ari da alderdi politikoetako bozeramaileekin, Nafarroako Gobernurako Presidentetzarako hautagaiak izendatzeko.

Hain zuzen ere, ordu erdiko bilerak egin ditu gaur talde bakoitzarekin, Ganberan ordezkaritza txikiena duten alderdietatik hasita.

Bihar, berriz, Geroa Bairekin izango du lehen hitzordua, 10:00etan. PSNren bisita 10:30ean jasoko du, eta Navarra Sumarena 11:00etan.

Behin Ganbera osatuta, inbestidura saiorako atzerako kontaketa hasiko dute. Izan ere, behin bilera sorta bukatuta, bilkura deialdia egingo dute.

Nafarroako hauteskundeak egin zituztenetik (maiatzaren 26a) hiru hilabete igarota hautagairik ez balego edota hautagaietako bat bera ere aurkeztuko ez balitz, Parlamentua desegingo lukete eta hauteskundeak deituko lituzkete berriro ere.

Hualdek, halaber, erakundeetatik egingo dituen bisiten egutegia aurkeztu du. Gaur, Uxue Barkos jarduneko presidentearekin elkartu da. Bihar Enrique Maya Iruñeko alkate berriarekin hitz egingo du.

Hau zure interesekoa bada, baliteke beste gai hauek ere izatea
Politika PSN Geroa Bai Nafarroa EH Bildu Izquierda-Ezkerra Eguneko albisteak Albisteak Nafarroako Parlamentua Podemos Ahal Dugu Nafarroa Navarra Suma