'Guztiak kabitzen garen' Euskadi batean akordiorako borondatea berretsi du Mendiak

"Abertzaleak eta ez abertzaleak, guztiak sartzen garen Euskadi bat babesteko gure borondate irmoa berresten dugu sozialistok", azpimarratu du Idoia Mendia PSE-EEko idazkari nagusiak Bilbon.

Mendiak Ramon Rubial sarien banaketan hitza hartu du. Adituen batzordeak testu artikulatuaren proposamenak Eusko Legebiltzarrean entregatzeko ordu gutxi batzuk falta dira, eta oraindik ez dute adostasunik lortu.

Estatutu berriaren eztabaidan "guk ez dugu gure erantzukizuna saihestu. Pentsatzen eta egingo duguna disimulatzeko ez gara pertsona adituen atzean ezkutatu. Ez gara hitzetan ezkutatzen, ez gara hiztegiarekin nahasten. Euskadiren aniztasuna berretsi nahi dugu sozialistek", adierazi du PSE-EEren buruzagiak.

"Lotzen gaituen diktadurarik eta terrorismorik gabe, eskubide sozialak sendotzeko eta aniztasuna blindatzeko elkarbizitzarako itun berri bat bilatzen ari gara, etorkizunak elkarrekin eraikitzen jarraitzeko. Zalantzarik, arriskurik, frustraziorik eta istilurik sortu gabe. Akordioaren bila buru-belarri", gaineratu du.

"Elkarbizitzarako akordio berri bat nahi dugu, eskubide sozialak sendotzeko, gizartearen aniztasuna bermatzeko. Borrokarik gabe, frustrazio barik. Guztientzako herri bat eraiki. Aniztasunean berdintasuna bultzatuz", zehaztu du euskaraz.

"Hori da gure bokazioa eta gure esfortzua: guztiek tokia izatea. Berdinak gara eta ezberdinak gara. Onartzen dugu, hori da guztiek ulertu beharko luketena", nabarmendu du.

Ramon Rubial Fundazioak Antonio Costa Portugaleko lehen ministroa, Gorabide, Maribel Salas, Aernova, Ainhoa Arteta, Realeko emakumezkoen taldea, Ser Euskadi irratia, Jose Antonio Nielfa La Otxoa eta Nicolas Redondo Urbieta saritu ditu.

Espainian Gobernua "laster martxan" izatea espero du Antonio Costa Portugaleko lehen ministro sozialistak. Era berean, Pedro Sanchez PSOEko buruzagiak "gobernu berri aurrerakoi" bat osatzeko garaian "arrakasta izatea" nahi du Costak.