Sanchezen inbestidura dela eta jasandako mehatxuak epaitegietan salatuko ditu PSOEk

Pedro Sanchez hautagai sozialista Espainiako Gobernuko presidente izateko inbestidura dela eta diputatu sozialistek jasandako mehatxuak epaitegietan salatuko dituztela iragarri du Adriana Lastra PSOEk Kongresuan duen bozeramaileak astearte honetan. Eguerdian egingo dute bigarren bozketa, eta Sanchezek aurreikusitako boto guztiak behar ditu presidente izateko.

"Mehatxu, jazarpen, difamazio eta kalumniei dagokienez, epaitegietara joko dugu, demokrazia defendatzeko. Gobernu aurrerakoi baten alde oso harro bozkatuko dugu gaur", esan du Lastrak Twitter bidez zabaldu duen mezu batean, hainbat diputatuk euren botoa aldatzeko jaso dituzten mezu eta presioei erreferentzia eginez.

Lehen bozketaren ostean, aurreko egunetan presio handia jasan zutela salatu zuten hainbat diputatuk. Hala, gaurko bozketa egin aurretik, botoa aldatzeko mehatxu horiek areagotu egin direla ziurtatu dute. Lehen bozketan, Sanchezek aldeko 166 boto lortu zituen, eta kontrako 165.

Jose Luis Aceves Segoviako diputatu sozialistaren esanetan, bere alderdiko kide bat probintzia horretan jasaten ari den "mehatxuak" salatuko du Espainiako Poliziaren aurrean.

Halaber, Tomas Guitarte Teruel Existe alderdiko diputatuak jasandako "presio antidemokratikoak" salatu zituen alderdi horrek igandean. Jazarpenak, baina, sare sozialetan eta mezu elektroniko anonimoen eta telefono partikularren bidez jarraitu du.