Blanquernako eraso faxistaren epaia berriro idazteko agindu du Konstituzionalak

Madrilgo Blanquerna kultura-etxean indarrez sartu ziren hamalau faxisten aurka emandako epaia berriro idazteko agindu dio Auzitegi Konstituzionalak Gorenari, epaiketa berme guztiekin egin ez zela iritzita.

Kataluniako Gobernuaren egoitza da Blanquerna zentroa eta 2013ko Diadan hitzaldi bat antolatu zuten han, baina faxista talde bat indarrez sartu zen aretoan eta ekitaldia bertan behera utzi behar izan zuten.

2016ko urtarrilean egin zuten epaiketa eta Madrilgo Lurralde Auzitegiak sei eta zortzi hilabete arteko espetxe-zigorra ezarri zien desordena publikoak eragitea leporatuta.

Alabaina, urtebete geroago eta Fiskaltzak eta Kataluniako Gobernuak aurkeztutako helegiteak aintzat hartuta, Auzitegi Gorenak zigorrak gogortu zituen. Arrazoi ideologikoengatik egindako erasoa izan zela argudiatuta, hiru eta lau urte arteko espetxealdia ezarri zizkieten auzipetuei.   

Zigortuen defentsak errekurtsoa aurkeztu zuen Auzitegi Konstituzionalean, Gorenak akusazioaren printzipioa urratu zuela esanez. Hasieratik leporatu ez zieten delitu bategatik zigortu zituztela eta, ondorioz, defendatzeko aukerarik izan ez zutela argudiatu zuten abokatuek. Eta orain Konstituzionalak arrazoia eman die.