Politika -
Hauteskunde aurrerapena
Galiziako hauteskundeak ere apirilaren 5ean izango dira, Feijook iragarri duenez
Xuntaren presidenteak hauteskunde aurrerapenaren berri eman du, Iñigo Urkullu lehendakariak egin eta ordu gutxira.
agentziak | erredakzioa
Alberto Nuñez Feijoo Xuntaren presidenteak baieztatu du Galiziako hauteskundeak aurreratu egingo dituela eta apirilaren 5ean izango direla, baina ez du argitu hautagai izango ote den, eta bihar 12:30ean emango duen prentsaurrekoan iragarriko du.
Iñigo Urkulluk gaur arratsaldean hauteskunde aurrerapenaren iragarpena egin eta berehala, Galiziako presidenteak komunikabideei deitu die eta hauteskunde aurrerapena iragarri du.
Berez udazkenean izan behar ziren bozak, baina aurrerapenarekin "hauteskunde epea sei-zazpi hilabetetik 54 egunera murriztu" nahi izan omen du, "Galizian azken 11 urteetan izan den egonkortasun instituzionala eta soziala bermatzeko".
Hori horrela, EAEko herritarrek eta galiziarrek egun berean bozkatuko dute laugarren aldiz jarraian, 2009an, 2012an eta 2016an egin ostean, baina Nuñez Feijook berretsi du "Galiziarentzat onena" delako aukeratu duela data hori.
Aitortu du lehendakariarekin hitz egin duela hauteskunde dataren inguruan, baina ukatu egin du Urkullu jarraitu besterik egin ez duenik edo Kataluniako hauteskundeek eragina izan dutenik.
