Durangoko bonbardaketa gogoratuko dute gaur, kalean ekitaldirik egin gabe

Kanpaiak joko dituzte, sua piztuko dute biktimen omenez, eta sirena hotsak entzungo dira Durangon (Bizkaia), duela 83 urte faxista italiarrek herria bonbardatu zutela gogoratzeko.

Koronabirusaren zabalkundeari aurre egiteko ezarri den osasun-alerta dela eta, Durangoko Udalak eta Gerediaga Elkarteak ezin izan dute ekitaldirik antolatu kalean.

Horren aurrean, Udalak udal sarea eta sare sozialak erabili ditu erasoarekin lotutako ekimenak zabaltzeko, tartean bonbardaketari buruzko dokumental bat, argazki erakusketa bat eta adierazpen instituzionala.

Era berean, Durangoko herritarrek leiho eta balkoietan xingola beltzak dituzten ikurrinak edo zapiak jartzeko deia egin dute.