Patxi Lopez: 'Bilduko buruzagiak lanaldi erdiko demokratak dira'

Patxi Lopez lehendakariak Bilduko buruzagien portaerak salatu ditu gaur, "lanaldi erdiko demokratak" direla esanda, "euren alde iluna ez dutelako guztiz utzi" eta ez dutelako argi eskatu ETA desegiteko.

Lehendakariak adierazpen horiek egin ditu bere blogeko artikulu batean, "lanaldi erdiko demokratak" izenburupean. Bertan, Batasuna ohiko kideek Bildu alderdian duten papera aztertu du.

Patxi Lopezen arabera, "ibilbide demokratiko handia geratzen zaion jendea dago Bildun", erakundeetako "boterea erabiltzeko demokratak" direlako, baina iraganera askotan itzultzen direlako.

"Legezkotasunetik edo herritarren presiotik kanpo daudela uste duten bakoitzean, beste denbora batzuetako indar ezkutuetan bilatzen dute babes, euren kabuz aurrera egiteko gai izango ez balira bezala indarkeria zaharraren laguntzarik eta ahalmenik gabe; azken hori, izan duten elementu bateratzailerik indartsuena izan da", adierazi du Lopezek.

Lehendakariaren ustez, hori da "pasatutako indarkeria ez kondenatzeko edo ETA desegiteko argi eskatzeari uko egitearen arrazoia".

Lopezek azaldu duenez, "batzuentzat lanaldi erdi demokratikoa geroz eta laburragoa da", Martin Garitano Gipuzkoako ahaldun nagusiak egindako adierazpenei buruz hitz eginez. Azken horrek ostiralean esan zuenez, ETAk Katalunian egin zituen atentatuak "akats larriak" izan ziren eta ezker abertzaleak "errespetu berezi bat zor die Kataluniako biktimei".