Kongresuak onartu egin du Konstituzioaren erreforma izapidetzea

Konstituzioan defizit publikoari mugak jartzeko helburuz PSOEk eta PPk adostutako erreformak lehen izapidea gainditu du astearte honetan Diputatuen Kongresuan. Hain zuzen ere, erreforma izapidetzea onartu dute.

Erreformak 318 boto izan ditu alde (PSOE, PP eta UPN), 16 aurka (EAJ, ERC-IU-ICV, BNG, UPyD, NaBai eta Antonio Gutierrez sozialista) eta 2 abstentzio (CC). CiUko 10 diputatuek ez dute parte hartu bozketan, eztabaidan ekimenaren aurka agertu badira ere.

Halaber, erreforma premiazko bidetik izapidetzea ere onartu du Ganberak, 319 diputatuk alde eginda, eta 17k aurka. Horrenbestez, baliteke ostiralean bertan onartzea.

Orain, 48 orduko epea zabaldu da zuzenketak aurkezteko.

Saioan, PSOEk eta PPk defendatu egin dute erreforma, eta Ongizate Estatua bermatzea helburu duela adierazi dute. Gainerako taldeak, baina, aurka agertu dira, eta gardentasun falta egotzi die bi alderdi nagusiei.

IU eta ICV Auzitegi Konstituzionalera jotzeko prest agertu dira, Kongresuko Mahaian aurkeztutako inpugnazioa errefusatzen badute.

PSOE: "Erreformak ez du ekarriko murrizketa sozialik"

Saioan, Jose Antonio Alonso bozeramaile sozialistak Konstituzioan aurrekontuen oreka zehaztea baino modu hoberik ez dagoela "zalantzak" ezabatzeko. "Herrialdeak ordaindu egiten ditu zergak, eta ez da zalantzarik egon behar horren ildotik", gaineratu du.

Diputatu sozialistak argi utzi nahi izan du erreformak ez duela "murrizketa sozialik" ekarriko, eta, are gehiago, "garaipen sozialak" bermatzea duela helburu.

PP : Erreforma, "beharrezkoa eta egokia"

Bere txandan, Saenz de Santamariak esan du erreforma "beharrezkoa" dela; bere esanetan, azken hiru urteotako esperientziak eta azken asteotako asaldurak aurrekontu-desorekak "gizarte-ongizaterako onartezinak diren arriskuak" direla islatu dute.

Halaber, erreforma "egokia" dela ere esan du, Espainiak "bere buruan konfiantza duen herrialde bat dela, eta besteen konfiantza merezi duela" erakusten duelako. Bere iritziz, erreforma honekin Espainia berriro egongo da lidergoan, "gobernu ekonomiko zehatz eta zorrotz batekin", eta diru-batasunari eta ekonomia-batasunari ekarpen bikaina egingo dio.

IUk matxinada bat nahi du PSOEn Gaspar Llamazares IUren parlamentu-bozeramaileak matxinada bat antolatzeko eskatu die PSOEren diputatuei, ekimena baztertzeko eta hauteskundeak deitzeko, herritarrek euren iritzia emateko aukera izan dezaten. Erreformaren proposamena bere horretan jarraitzea erabakitzekotan, aldiz, erreferenduma exijitu du. Halaber, Llamazaresek esan du "kolpea" dela Konstituziorako, herri-borondatea eta parlamentu-jarduera bahitzen ditu eta.

EAJren ustez, negargarria da Konstituzioa erreformatzea Josu Erkoreka EAJren diputatuak zehaztu du erreforma "erabateko bidegabekeria dela prozedura demokratikoetarako" eta Estatuaren egitura ez duela errespetatzen; izan ere, autonomia-erkidegoetan eta Udaletan izango du eragina, baina horiei ez die inork ezer galdetu. Era berean, esan du erreforma ez dela ez eraginkorra ezta beharrezkoa ere, Konstituzioak Espainia Europako zuzenbidea betetzera behartzen duelako, eta aurreratu du bere taldeak erreformaren aurka emango zuela botoa eta zuzenketa bat aurkeztuko zuela.

NaBai eta UPN

Uxue Barkos UPNko diputatua erreformaren aurka agertu da, eta edukia eta onartzeko modua "onartezinak" direla salatu du.

Aitzitik, Carlos Salvador UPNko ordezkariak iragarri du bere alderdiak babestu egingo duela erreforma, baina etorkizunean akordio zabalagoak egotea espero duela erantsi du.