Beste hiru eskumenen transferentzia adostu dute PSOEk eta EAJk

Gobernuko, PSOEko eta EAJko ordezkariek osatutako Transferentzien Aldebiko Batzordeak Euskadiri beste hiru eskumen lagatzea adostu du gaur. Hiru transferentzia berri horiek 2010eko urrian aurrikusi zituzten jeltzaleek eta sozialistek, aurrekontuen akordioan.

Konkretuki, EAEko AP-68 eta AP-1 (kilometro bakarra) autobide tarteak, bidaia-agentziak eta botika produktuen legedia aplikatzeko eskumena adostu dituzte bi alderdiek.

Aitor Esteban EAJko ordezkariak eta Jose Maria Benegas diputatu sozialistak prentsaurrekoan azaldu dute akordioa. Gaspar Zarrias Lurralde Politikako estatu-idazkariak aldebiko bileran parte hartu du arratsaldean.

EAJko eta PSOEko diputatuek azaldu dutenez, aldiriko trenen eta soldatak bermatzeko fondoaren (FOGASA) transferentziak adosteko zailtasun handiak daude.

Bigarren seihilekoan transferitzeke dauden beste bost eskumenen inguruan eztabaidatu dute negoziatzaileek. Legealdia amaitu baino lehen horietakoren bat adostea espero du Aitor Estebanek. FOGASA eta aldiriko trenez gain, eskola aseguruak, segurtasun zerbitzu pribatuak eta banku eta kredituak transferitzeke daude.