ETAren amaiera eta krisia, politika orokorreko eztabaidaren ardatzak

Legealdiko politika orokorreko bigarren eztabaida izango da ostegun honetan, Eusko Legebiltzarrean. Krisi ekonomikoa eta terrorismoaren amaiera ardatz nagusiak izango dira eztabaida horretan.

Osoko bilkura 09:30ean hasiko da lehendakariaren hitzaldiarekin. Bi orduko iraupena izango du. Lopezen hitzaldiaren laburpen bat jakitera eman du Eusko Jaurlaritzak, baina ez du xehetasun gehiegirik eman. "ETAren aroa oinarri demokratiko sendoetan ixteko" konpromisoa hartuko du lehendakariak. Era berean, zerga iruzurrarekin amaitzeko konpromisoa azalduko du Lopezek.

Lopezen hitzaldiaren ostean, talde politikoen txanda izango da. EAJko iturriek aurreratu dutenez, Joseba Egibar bozeramaile jeltzaleak hartuko du hitza. Krisi ekonomikoari aurre egiteko garaian Eusko Jaurlaritzaren "gabeziak" kritikatuko ditu EAJk. Era berean, ezker abertzalea erakundeetara itzultzeak eta ETAren su-etenak utzitako egoera politikoki kudeatzeko orduan Exekutiboaren "moteltasuna" salatuko du Egibarrek.

Bestalde, zerga-sistema, laguntza sozialak, gastu ustelak, lan-merkatua eta autonomoak mintzagai izango ditu Antonio Basagoiti PPko presidenteak, eta neurri alternatiboak proposatuko ditu. Gainera, nahiz eta "ETAren amaieraren aurrean hobeto" gaudela onartu, "helmugara heldu arte funtzionatzen duen erreitik ez ateratzea" beharrezkoa dela ohartaraziko du Basagoitik, erakunde terrorista desagertu arte.

Jose Antonio Pastor PSEko bozeramaileak zerga politikan, bakean eta gardentasun politikoan, lanaren sustapenean eta gardentasun politikoan oinarrituko du bere hitzaldia.

Aintzane Ezenarro Aralarreko bozeramaileak "adoreaz" jardutea eskatuko dio Patxi Lopezi, bereziki bakerako aro itxaropentsu batean. Ekonomiari dagokionez, "alor fiskalean oinarrizko neurriak" eskatuko ditu Ezenarrok.

Juanjo Agirrezabala EAko legebiltzarkideak "oraingo bake egoera bultzatzen laguntzen dituzten espainiar mugimendu sozialistak zuzentzea" eskatuko dio lehendakariari.

Mikel Aranak, EBk Legebiltzarrean duen ordezkariak, Patxi Lopez alderdiekin akordio batera heldu gabe, bakegintzaren inguruan "titular bat bilatzea" gaitzetsiko du. Horretaz gain, krisi ekonomikoaren inguruan izandako "ezgaitasuna eta gelditasuna" kritikatuko du Aranak.

Jaurlaritzak krisi ekonomikoaren kontrako borrokan izandako "gelditasuna" kritikatuko du Gorka Maneiro UPyDko legebiltzarkideak, eta Euskal Herrian dagoen "nahaste-borraste instituzionala" konpontzea eskatuko du. Horretaz gain, ETAren kontrako borrokan "berdinkerarekin" eta presoen amnistiarekin ados ez daudela adieraziko du.