25 urteko espetxe-zigorra diskoteka baten aurka eraso egiteagatik

Luis Mariñelarena eta Roberto Lebrero ETAko kideak zigortu ditu Auzitegi Nazionalak, 2001ean Lakuntzako (Nafarroa) 'Universal' diskotekaren aurka hiru lehergailu jartzeagatik. Xabier Etxebarria hirugarren auzipetua absolbitu dute, beste bi akusatuek errugabetu dutelako.

Eraso terrorista leporatuta 15 urteko kartzela-zigorra ezarri dio ETAko kide bakoitzari Auzitegi Nazionalak. Era berean, 10 urteko espetxe-zigorra ezarri diete legez kanpoko atxiloketa egiteagatik.

Era berean, auzipetuak diskotekako jabeei 900.000 euroko kalte-ordaina pagatzera zigortu ditu auzitegiak. Bestalde, lokaleko ikus-entzunezko materialearen jabeei 180.000 euro eta zaindariaren oinordekoei 3.000 euro ordaindu beharko dizkiete zigortuek. Izan ere, 2001ko irailaren 28an, atentatua egin zutenean, diskotekako zaindaria atxiki zuten erasotzaileek.

Etxebarriaren parte-hartzea ukatu zuten zigortuek epaiketan, auzitegiak gogorarazi duenez. Etxebarria Frantzian zigortu zuten erakunde terroristako izatea egotzita. Bi ETAko kideek Etxebarria ezagutzen zutela onartu zuten, baina laguntzarik eman ez ziela erantsi zuten, aldez aurretik atxilotu zituztelako.

2001ko irailaren 27an 22:00ak aldera Mariñelarenak, Lebrerok eta hirugarren erasotzaile batek diskotekako zaindariari eraso egin zioten haren etxearen atarian (diskotekan zuen etxebizitza). Eskuak lotu eta txano bat jarri zioten, bien bitartean lehergailuz betetako hiru motxila jarri zituzten establezimenduan.