EH Bildu: "Data lotsagarria da proiektu inperialista bat irudikatzen duelako"

EH Bilduren Mahai Politikoak adierazpen bat argitaratu du igande honetan: "Hispanitatearen Eguna soilik interpretatu daiteke jarrera demokratiko eta aurrerabidetik data lotsagarri bezala; izaera inperialista, kolonialista eta sakonki erreakzionarioa duen proiektu bat irudikatzen duelako".

"Euskal Herriak ospatzeko ezer ez du urriaren 12an", ziurtatu du koalizioak. Horregatik, "konpromisorik handiena adierazi nahi du herrien autodeterminazio eskubidearekin, gatazken konponbide baketsuarekin eta gizarte askeak, bidezkoak eta berdintasunezkoak eraikitzearekin", erantsi duenez.

"Kolonizazioarekin hasitako 'obra' handiaren herentzia politiko eta kulturalaren parte da nazio bakar baten existentzia besterik ez onartzeko proiektu supremazista, euskal, katalan eta galegoa bezalako nazioen existentziari erakutsitako mespretxuarekin batera", salatu du adierazpenean.

Koalizioaren hitzetan, "gaur egun, menderatze eta ustiatze proiektu horrek ezinbestean eskatzen du nazio bakarra onartzen duen Konstituzioa defendatzea, nazio horren batasuna banaezintzat jotzen duena eta, gainera, bere Armadari haren defentsa esleitzen diona".

“Euskal Herriak ospatzeko ezer ez du urriaren 12an”, errepikatu du EH Bilduk, eta "konpromisorik handiena" adierazi du "herrien autodeterminazio eskubidearekin".

"Horregatik guztiagatik, gure nazio nortasuna ukatzeko ahaleginen aurrean, gure nazio izaera mespretxatzearen aurrean, gure lurraldean okupazio indarren presentziaren eta errepresioaren aurrean, gure burujabetzaren aldeko konpromiso irmoa adierazten dugu, herri gehiengo zabalen eskubideak errespetatuko dituen gizarte eredu justu eta berdintasunezkoa eraikitzeko konpromisoa", nabarmendu du koalizioak.