Politika -
Auzitegi Nazionala
Carmen Gisasola absolbitu dute, ETAk 1990ean Galdakaon egin zuen erasoaren epaiketan
Epaimahaiak ebatzi du gertakariak preskribatuta daudela. Oskar Abad eta Jose Ramon Martinez ere absolbitu ditu. ETAk polizia bat hil zuen lehergailu bat zartarazita.
AGENTZIAK | ERREDAKZIOA
Espainiako Auzitegi Nazionalak Carmen Gisasola, Oskar Abad eta Jose Ramon Martinez absolbitu ditu ETAk 1990an Galdakaon egin zuen atentatua argitzeko epaiketan, gertakariak preskribatuta daudela ebatzita.
1990eko urtarrilaren 30ean, Ignacio Perez polizia hil zuen ETAk lehergailu bat zartarazita.
Fiskaltzak 30 urteko kartzela-zigorra eskatu zuen auzipetu bakoitzarentzat, baina epaimahaiak defentsaren argudioarekin bat egin du, Auzitegi Nazionalak 1993ean egindako probidentziak delituak preskribatzeko epea eteten ez duela ondorioztatuta.
Carmen Gisasolak 'Langraiz bidea'rekin bat egin zuen eta 2014an utzi zuten aske, 24 urteko espetxealdia bete eta gero.
Epaiketan, Gisasolak aitortu zuen ETAko kidea izan zela, baina azpimarratu zuen aspaldi utzi zuela erakunde armatua eta atentatuan parte hartu ez zuela ziurtatu zuen.
Abadek eta Martinezek ere ukatu egin zuten erasoan parte hartu izana. Bi preso ohiak libre daude 20 urtetik gora kartzela-zigorra bete ostean.
BIDEOA | Gisasolak, Abadek eta Martinezek atentatuan parte hartu izana ukatu zuten