EAJk ETAko presoen 'salbuespenezko legeei' amaiera ematea eskatu du

Josu Erkoreka Kongresurako EAJko hautagaitza buruak ETAko presoen "salbuespenezko legeei eta espetxeetako legediari" amaiera ematea exijitu dio Estatuari. "Litekeena da ETAren ekintza armatuko egoera batean zentzua izatea baina egun, ETAren iragarpenaren ostean dagoeneko ez du zentzurik".

Gasteizen izandako ekitaldi politikoan egin ditu Erkorekak adierazpen hauek. Emilio Olabarria Kongresurako Arabako EAJko hautagaitza burua eta Iñaki Gerenabarrena ABBko presidentea izan dira bertan.

Erkorekak egindako agerraldian, "aprobetxatu beharreko aukera historiko batean" gaudela azpimarratu du. "Ezin gara beso gurutzaturik egon, jazoeren zain. Konpromisoa hartu behar dugu eta arriskatu", adierazi du.

"Iraganeko zauriak gaindituko dituen gizarte bat eraikitzeko gai izan behar gara, hau da, elkarbizitzan oztopatu duten zailtasunei aurre egitea", zehaztu du.

"ETAk agur esan die armei baina behin betikoa eta iraunkorra izateko oraindik pausoak eman beharko dira; hori dela eta, ETAko presoen salbuespenezko legeak eta espetxeari dagozkion lege zehatzak bertan behera uzten hasi beharko da Estatua", azaldu du Erkorekak, "baliteke ETAren ekintza armatuko egoera batean zentzua izatea baina egun, ETAren iragarpenaren ostean dagoeneko ez du zentzurik".