Politika -
Euskadi Eguna
Lehendakaria: 'ETAren porrota gure autogobernuaren garaipena da'
"ETA joan egin da, baina Estatutuari esker garatutako autogobernuaren erakundeek aurrera jarraituko dute", azpimarratu du Patxi Lopezek Euskadi Egunaren harira egindako ekitaldi instituzionalean.
Erredakzioa
Patxi Lopez lehendakariak astearte honetan adierazi duenez, ETAk jarduera armatua behin betiko uztearen erabakiak talde terroristaren "porrota" erakusteaz gain, "geure autogobernuaren garaipena ere adierazten du eta hori zilegi egin zuen akordio garrantzitsuarena". "ETA joan dela esan dezakegu, baina Estatutuak argiztatu dituen autogobernuko erakundeak gelditzen direla", nabarmendu du.
Eusko Jaurlaritzaren Lehendakaritzaren egoitzan izan da Patxi Lopez, Gernikako Estatutua erreferendum bidez onartu izanaren urteurrena ospatzeko. Ekitaldira Euskadiko erakundeetako ordezkariak joan dira, baita gizartearen ordezkaritza zabal bat ere. Aldiz, besteak beste, Bilduko arduradun politiko eta instituzionalak ez dira bertan izan.
Lehendakariaren ustez, ETAren erabakiak terrorismoaren porrota ekarri ez ezik, "egun hartan Estatutuaren eta demokraziaren alde egin zuen gizartearen zati handi baten ospea ere ekarri du, herrialde bat egiteko aukerak aprobetxatu zituenena, hainbat urtetan borrokatu dutenaren aurka".
Lopezek adierazi duenez, Euskadiren Egunaren ospakizuna aurten "etorkizun berri bat eraikitzeko aro baten" aurrean eman da, "beldurraren itzalik gabeko" etorkizun batean. "Askatasuna bizikidetzan bizitzeko denbora da. Era demokratikoan elkarrekin bizitzen ikasi behar dugu, beldurra betiko utzita, etorkizuna eta planteamendu politiko totalitarioak gaindituta", gaineratu du.
"Orain arte bizkarrari esku bat lotuta lan egin izan dugu indarkeria terroristagati. Gaur geure etorkizunaren jabe gara", azpimarratu du.
Ekitaldi instituzionalean, Carlos Garaikoetxea lehendakari ohiari Gernikako Arbolaren Gurutzea eman dio Patxi Lopezek. Halaber Lan Onari goraipamena ondorengo pertsona hauei eman die: Pedro Anitua mediku eta ikertzailea; Juan Angel Balbas Debabarreneko Garapen Ekonomikorako Elkarteko zuzendari nagusia; Ana Blanco kazetaria; Martin Fiz kirolaria; Juan Pablo Fusi historialaria eta Milagros Garcia Crespo ekonomialaria. Lagun Onari goraipamena Jose Ignacio Sanchez Galanek jaso du.
