Politika -
Hauteskundeak Madrilen
Hasi da kanpaina Madrilen, Ayusoren eta Sanchezen arteko talkan fokua jarrita
Voxek izan ezik, alderdi guztiek hautesleei dei egin diete ekintzetan, hauteskunde kanpainaren hasieraren bezperan.
EITB Media | Agentziak
Madrilgo hauteskunde kanpaina igande honetan hasi den arren, alderdi gehienek bezperan egin zituzten kanpaina hasierako ekitaldiak. Pedro Sanchez Espainiako Gobernuko presidentean eta Isabel Diaz Ayuso Madrilgo Erkidegoko presidentearen arteko talka gisa planteatu dira bozak. Izan ere, Ayuso PPko hautagaiak argi esan du Sanchez dela bere aurkari “zuzena”.
PP eta PSOE, aurrez aurre
Larunbateko ekitaldian, Isabel Diaz Ayuso, Pablo Casado eta Jose Luis Martinez-Almeidarekin batera, hauteskundeak irabazteko itxaropentsu agertu zen, eta PSOEk “inoizko daturik txarrenak” izango dituela esan zuen. Hortaz, alderdi popularreko ordezkariaren hitzetan, datuok ikusirik, Pedro Sanchezek “Moncloatik ihes egin behar” izango du.
“Gertatu egingo da, Madrilen inoiz izan den parte hartzerik handienarekin gertatu ere, eta orduan Espainiak zor hirukoitza izango du nirekin”, berretsi zuen Ayusok.
Bestalde, Angel Gabilondo PSOEko hautagaiak azpimarratu du arerioa “askatasuna bera ostu eta bereganatu nahi duena” dela, eta erkidego hauteskundeetan “muturrerako joera duen eskuina” kanpoan uzteko eskatu du. Pedro Sanchez presidentea ez da egon Gabilondoren ekitaldian, bai, ostera, Reyes Montero Industria, Merkataritza eta Turismo ministroa.
Bestelako alderdiak
Edmundo Bal Ciudadanoseko hautagaiak PPrekin koalizioa berreskuratzeko deia egin du, eta Pablo Iglesias Unidas Podemoseko ordezkariak “banderarekin kolperik eman behar ez dutenen” aldeko aldarria egin du.
Mas Madridek Monica Garcia hautagaiaren bideo bat bidali du, eta Voxek, berriz, ez du ekintza berezirik antolatu, Santiago Abascalen ohiko mitin bat baizik.
