Politika -

INDULTUAK

Sanchezek garrantzia kendu dio balizko indultuen kostu politikoari

Espainiako Gobernuko presidentearen ustez okerragoa litzateke gauzak 2017tik Katalunian dauden bezala uztea.

Poloniako lehen ministroa eta Pedro Sanchez Espainiako Gobernuko presidentea. Argazkia: EFE
Poloniako lehen ministroa eta Pedro Sanchez Espainiako Gobernuko presidentea
Poloniako lehen ministroa eta Pedro Sanchez Espainiako Gobernuko presidentea. Argazkia: EFE

EITB MEDIA | AGENTZIAK

Whatsapp Facebook Twitter Telegram Email

Pedro Sanchez Espainiako Gobernuko presidenteak garrantzia kendu dio balizko indultuek izan dezaketen kostu politikoari, eta Katalunian elkarrizketan oinarritutako aro berri bat irekitzearen alde hitz egin du. Hala ere, ez du zehaztu indultuen inguruko erabakia noiz etorriko den.

Poloniako lehen ministroarekin astelehen honetan izandako bileraren ondotik, Kataluniako prozesuaren auzian zigortutakoei indultuak ematearen alde hitz egin du. Haren iritziz, Gobernuak "kontzienteki" hartuko du erabakia izan ditzakeen ondorio negatiboetan pentsatu gabe.

"Arazoak konpontzen laguntzeak ez du kosturik", azpimarratu du Sanchezek, eta ez du uste "gauzak dauden horretan" uztea hobea denik.

Sanchezen ustez, indultuen inguruko erabakiak "iragan txar batetik etorkizun hobe batera" igarotzeko eta "elkarrizketa, adiskidetasuna eta kohesioa" oinarri izango dituen aro berri bat irekitzeko aukera emango du.

Ez du zehaztu indultuen inguruko erabakia noiz etorriko den. Haren esanetan, Justizia Ministerioak alde guztien txostenak aztertu behar ditu, eta, ondoren, buruzagi independentista bakoitzaren espedienteak prestatu behar ditu.

Txosten horiek prest daudenean eramango omen dute erabakia Ministroen Kontseilura. "Ezin dut datarik eman", gaineratu du.

Kataluniako elkarrizketa mahaia berreskuratzeari buruz galdetuta, Sanchezek uste du aurrena Pere Aragones Generalitateko presidente berriarekin bildu behar duela: "Gero, nahi ditugun bilera guztiak egiteko denbora egongo da".

 

Hau zure interesekoa bada, baliteke beste gai hauek ere izatea
Katalunia albisteak Politika Espainiako Gobernua argazkiak Pedro Sánchez Eguneko albisteak Albisteak Kataluniako prozesua zuzenean Kataluniako Generalitatea Amnistia Legea